Oʻzbekistonda oʻqituvchilarni zoʻravonlikka moyillik boʻyicha tekshirish rejalashtirilmoqda

Oʻzbekiston 2025-yil uchun davlat dasturi loyihasida oʻqituvchilarni bolalarga nisbatan zoʻravonlikka moyillik boʻyicha aniqlash tizimini joriy etishni rejalashtirmoqda. Ushbu tashabbus ta'lim muassasalarida xavfsizlikni ta'minlash va oʻquvchilar uchun sogʻlom muhit yaratishga qaratilgan.

Loyiha maktablarda zoʻravonlikning oldini olish uchun bir qator chora-tadbirlarni oʻz ichiga oladi. Muhim yoʻnalishlardan biri pedagoglarning psixologik barqarorligini mustahkamlashdir. Ushbu maqsadda oʻqituvchilarni stressni boshqarish va oʻquvchilar bilan konstruktiv muloqot qilish koʻnikmalarini rivojlantirish boʻyicha malaka oshirish kurslari tashkil etish taklif etilgan.

Shuningdek, Maktabgacha va maktab ta'limi vazirligiga oʻquv jarayonining barcha ishtirokchilari, jumladan oʻqituvchilar va oʻquvchilar uchun psixologik yordam tizimini takomillashtirish tavsiya etilgan. Bu kengaytirilgan psixologik maslahatlar va hissiy charchashning oldini olish dasturlarini ishlab chiqishni oʻz ichiga oladi.

Oʻzbekistonda bundan avval davlat xizmatchilarini korruptsiyaga moyillik boʻyicha tekshirish tashabbusi ilgari surilgan edi. Oʻqituvchilarni zoʻravonlikka moyillik boʻyicha tekshirish yangi davlat dasturining bir qismi sifatida amalga oshiriladi. Ushbu tizimning mexanizmlari, usullari va baholash mezonlari dastur ijrosi doirasida aniqlashtiriladi. “Zamin” yangiliklarini “Telegram”da kuzatib boring