O‘zbekistonda pedagoglar uchun sirtqi ta’lim bekor qilinadi

O‘zbekistonda pedagog kadrlar tayyorlash tizimiga muhim o‘zgarishlar kiritiladi, deb xabar bermoqda nova24.uz hukumat qaroriga asoslanib.

Ma’lumotlarga ko‘ra, 2025/2026 o‘quv yilidan boshlab oliy ta’lim muassasalarida pedagoglarni faqat kunduzgi va kechki shaklda o‘qitish tashkil etiladi. Sirtqi ta’lim shakliga qabul to‘xtatiladi.

Pedagogik yo‘nalishda xususiy ta’lim xizmatlari faqat Maktabgacha va maktab ta’limi vazirligining xulosasiga asosan litsenziya oladi.

Yangi o‘quv yilidan boshlab xalqaro ta’lim dasturlari bo‘yicha professor-o‘qituvchilar tanlovi yo‘lga qo‘yiladi, xorijiy mutaxassislar jalb qilinadi.

Shuningdek, maxsus ehtiyojli bolalar ta’limini rivojlantirish maqsadida “Gospital pedagogika” magistratura yo‘nalishi ochiladi.

2026 yil 1 sentyabrdan boshlab pedagogika texnikumlarida xalqaro ta’lim dasturlari bosqichma-bosqich joriy etiladi.