Janubiy Koreya Toshkent–Andijon pullik yo‘l qurilishida ishtirok etadi

O‘zbekistonda Toshkent — Andijon yo‘nalishida qurilishi rejalashtirilayotgan pullik avtomagistral loyihasida Janubiy Koreya ishtirok etishi mumkin, deb xabar berdi UPL.uz.

2025 yil 6 iyun kuni Transport vaziri o‘rinbosari Ilhomjon Abdug‘afurov Janubiy Koreyaning yer resurslari, infratuzilma va transport vaziri Pak Sang U hamda Korea Expressway Corporation rahbari Ham Jingyu bilan uchrashuv o‘tkazdi. Uchrashuvda transport sohasidagi hamkorlik va yo‘l infratuzilmasini rivojlantirish masalalari ko‘rib chiqildi.

Koreya tomoni O‘zbekistonda magistral yo‘l boshqaruvi, aqlli svetoforlar, sun’iy intellekt asosidagi harakat nazorati tizimlarini joriy etishni taklif etdi. Shuningdek, texnik yordam ko‘rsatish va mahalliy mutaxassislarni tayyorlashni ham taklif qildi.

Janubiy Koreya Toshkent–Andijon pullik magistral yo‘li loyihasida davlat-xususiy sheriklik asosida ishtirok etish niyatini bildirdi. Korea Expressway Corporation o‘zining aqlli to‘lov tizimlari, trafik monitoring datchiklari va boshqa raqamli yechimlarini taklif qilmoqda.

Yo‘lning umumiy uzunligi 314 km bo‘lib, u orqali safar vaqti 5 soatdan 3 soatgacha qisqaradi. Mutaxassislarning hisob-kitobiga ko‘ra, ushbu loyiha O‘zbekiston YAIMini 2,6% ga oshirishi, yo‘l-transport hodisalarini esa 40% ga kamaytirishi mumkin.

Loyiha Jahon banki ko‘magida ishlab chiqilgan va 2025 yil yanvarda xalqaro tender e’lon qilingan. 30 dan ortiq xorijiy kompaniyalar qiziqish bildirgan va arizalar 21 iyungacha qabul qilinadi.

Yo‘l infratuzilmasini to‘liq raqamlashtirish maqsadida aqlli svetoforlar, real vaqtda nazorat tizimlari joriy etilishi rejalashtirilgan. Janubiy Koreya, shuningdek, kadrlar tayyorlash uchun maxsus o‘quv dasturlarini taklif qilgan.

Ularning tizimi avtomobil harakatini to‘xtatmasdan kamera va datchiklar orqali avtomatik to‘lov tizimini yo‘lga qo‘ygan bo‘lib, bu tirbandlikni kamaytirish va vaqtni tejash imkonini beradi.