O‘zbekistonda ayrim turdagi mahsulotlar uchun ekologik yig‘im tizimi yo‘lga qo‘yiladi. Bu haqda Ekologiya, atrof-muhitni muhofaza qilish va iqlim o‘zgarishi vazirligi 14 avgust kuni Prezidentga taqdim etgan maxsus taqdimotida ma’lum qilindi.
Qaysi mahsulotlar uchun ekoyig‘im bo‘ladi?
Yangi tartibning birinchi bosqichida quyidagi 6 turdagi tovarlar ekologik yig‘im doirasiga kiradi:
batareyka va akkumulatorlar;
transport vositalari;
moylash materiallari;
qadoq mahsulotlari;
shinalar va rezina kameralar;
shisha mahsulotlari.
Vazirlik ma’lumotlariga ko‘ra, hozirda mamlakatda chiqindilarning katta qismi poligonlarga yuboriladi va qayta ishlash darajasi ancha past. Masalan, shinalarning bor-yo‘g‘i 17 foizi, shishaning 6,3 foizi, plastmassaning esa 11,2 foizi qayta ishlanadi.
Chiqindilar hajmi va kelajak prognozlari
Yillik chiqindi hajmi juda katta: plastmassa bo‘yicha — 1,8 million tonna, elektron chiqindilar — 144 ming tonna, shisha — 647 ming tonna, moy — 250 tonna va rezina bo‘yicha 217 ming dona. Shuningdek, 2035 yilga qadar elektr chiqindilar hajmi yana 10 ming tonnaga ko‘payishi kutilmoqda.
Ekologik yig‘im joriy etilishi chiqindilarni qayta ishlash tizimini rivojlantirish, tabiatga zararni kamaytirish va resurslardan samarali foydalanishni ta’minlashga qaratilgan. Bu orqali qayta ishlash salohiyati oshirilib, poligonlarga chiqindilar oqimini kamaytirish rejalashtirilmoqda.
“Zamin”ni Telegramʻda oʻqing!
