Poytaxtga sotish uchun noqonuniy yo‘l bilan olib kelinayotgan yirik miqdordagi yaroqsiz go‘sht fosh etildi. Ichki ishlar vazirligining ma’lumot berishicha, Qashqadaryo viloyatidan Toshkentga yo‘l olgan 600 kilogrammdan ortiq go‘sht mahsuloti tegishli hujjatlarsiz va sanitariya qoidalariga zid ravishda tashilayotgani aniqlangan.
Ma’lumotlarga ko‘ra, bu go‘shtlar Cobalt rusumli avtomobil saloni va yukxonasiga joylashtirilgan holda olib ketilayotgan. Laboratoriya tekshiruvlari natijasida, hayvon go‘shti iste’molga mutlaqo yaroqsiz ekani aniqlandi. Mahsulot zararsizlantirish maqsadida yoqib yo‘q qilingan.
Shuningdek, rasmiy ma’lumotlarga ko‘ra, joriy yilning o‘tgan davri mobaynida Jizzax viloyati hududida ham 1,5 tonnadan ortiq yaroqsiz go‘sht iste’molga chiqib ketishining oldi olingan.
Ushbu holat yuzasidan 29 yoshli haydovchiga nisbatan Ma’muriy javobgarlik to‘g‘risidagi kodeksning tegishli moddalari asosida bayonnoma rasmiylashtirildi. Sud qaroriga muvofiq, unga 412 ming so‘m miqdorida jarima jazosi tayinlandi.
Mutasaddi idoralar aholini yana bir bor ogohlantirib, xaridorlar har qanday go‘sht mahsulotini sotib olishdan oldin sotuvchidan tibbiy daftarcha hamda veterinar xulosasini talab qilishi shartligini eslatdi. Chunki bu hujjatlarsiz sotilayotgan mahsulotlar iste’molchilar hayoti va sog‘lig‘i uchun jiddiy xavf tug‘dirishi mumkin.
Mas’ullar ta’kidlaganidek, bunday holatlarga yo‘l qo‘ymaslik uchun har bir fuqaro o‘zini va yaqinlarini himoya qilish maqsadida e’tiborli va talabchan bo‘lishi zarur.
“Zamin”ni Telegramʻda oʻqing!
