Rossiya O‘zbekistonda bir vaqtning o‘zida ikki atom elektr stansiyasini qurish borasida ish olib borishni rejalashtirmoqda. Bu haqida Rossiya Tashqi ishlar vaziri o‘rinbosari Sergey Ryabkov O‘zbekistonning Rossiyadagi elchixonasida O‘zbekiston mustaqilligining 34 yilligi munosabati bilan tashkil etilgan qabulda ma’lum qildi.
Uning so‘zlariga ko‘ra, bu loyiha Markaziy Osiyodagi atom energetikasi sohasida birinchi bo‘lib amalga oshiriladigan turdagi tadbirdir. Ryabkov ta’kidlaganidek, “O‘zbekistonda Rossiya loyihasi bo‘yicha ikkita atom elektr stansiyasi qurilishi ko‘rib chiqilmoqda: biri katta, biri kichik. Bu Markaziy Osiyo mintaqasida ilk mijoz loyihasi”, dedi.
Hozirda Rossiya va O‘zbekiston tomonlari loyiha ishlab chiqishning texnik va moliyaviy jihatlari, qurilish jarayonini bosqichma-bosqich amalga oshirish masalalari ustida muzokaralarni olib borishmoqda. Maqsad – har bir stansiyaning quvvati va texnologik imkoniyatlarini optimal ravishda ta’minlash, shuningdek mahalliylashtirish darajasini maksimal qilish.
Ma’lumot uchun, “Rosatom” rahbari Aleksey Lixachyov aprel oyi oxirida jurnalistlarga bergan intervyusida kichik AES qurilishi doirasida bir yil ichida beton quyilishini kutiyotganliklarini aytgan. U shuningdek katta AES bo‘yicha ham kompaniya tayyor takliflar ishlab chiqqanini, ular orasida moliya modeli, tashkiliy masalalar va mahalliy ishlab chiqarishni keng qo‘llash imkoniyatlari mavjudligini bildirgan.
Kichik AES O‘zbekistonda Rosatomning xorijdagi ilk eksport loyihasi hisoblanadi. Loyiha bo‘yicha ikki davlat o‘tgan yil bahorida kelishuvga erishgan, kuzda esa texnik hujjatlar va loyiha ishlarini boshlash to‘g‘risida protokol imzolangan edi.
Avvalgi rejalarga ko‘ra, har bir stansiya 55 MVt quvvatga ega olti reaktordan iborat bo‘lishi kerak edi. Qurilish ishlari joriy yil yozida boshlanishi, stansiyalar esa bosqichma-bosqich 2029–2033 yillar oralig‘ida ishga tushirilishi rejalashtirilgan.
Shu bilan birga, “Rosatom” rahbarining ilgari bildirishicha, loyihani moliyalashtirish O‘zbekiston tomoni zimmasiga yuklanadi, Rossiya krediti hozircha ko‘rib chiqilmayapti. Ryabkovning ta’kidlashicha, AESning muvaffaqiyatli amalga oshirilishi O‘zbekistonga zamonaviy texnologik yutuqlar va energiya sohasida katta imkoniyatlar yaratadi.
Bu loyiha nafaqat mamlakatning energetika tizimini mustahkamlaydi, balki xalqaro miqyosda O‘zbekistonning investitsiyaviy va texnologik imidjini ham yanada kuchaytiradi. Markaziy Osiyoda birinchi bor amalga oshirilayotgan bu turdagi AES qurilishlari mintaqada yadro energetikasi sohasida yangi tarixni boshlaydi.
“Zamin”ni Telegramʻda oʻqing!
