Poytaxt bozorlarida tashkil etilgan arzonlashtirilgan yarmarkalarda narx-navoning haqiqatda shaffof va adolatli bo‘lishi bo‘yicha qo‘shimcha choralar ko‘rilmoqda. Bu haqida Toshkent shahar hokimligi matbuot xizmati ma’lum qildi.
Ma’lumotga ko‘ra, hokimlik va Iqtisodiy jinoyatlarga qarshi kurashish departamenti tashabbusi bilan aholiga qulaylik yaratish, turli iste’mol mahsulotlarini arzon narxlarda taklif etish maqsadida maxsus savdo yarmarkalari yo‘lga qo‘yilgandi. Biroq so‘nggi kunlarda ijtimoiy tarmoqlarda ayrim rastalarda rasmiy belgilangan narxdan yuqoriroq baholarda savdo qilingani haqida shikoyatlar paydo bo‘ldi. Bu holat esa fuqarolarning noroziligiga sabab bo‘ldi.
Shu munosabat bilan mutasaddilar tomonidan narxlarni sun’iy ravishda oshirishning oldini olish va shaffoflikni ta’minlashga qaratilgan qo‘shimcha choralar ishga tushirildi. Xususan, arzonlashtirilgan mahsulotlar sotiladigan rastalarda kuzatuv kameralari o‘rnatish ishlari boshlandi.
Hokimlik ma’lumotiga ko‘ra, hozirgacha Mirobod dehqon bozori hamda “Eski Juva” (Chorsu) bozorida kuzatuv kameralari o‘rnatib bo‘lindi. Tez orada poytaxtning boshqa yirik bozorlarida ham shunday texnik nazorat tizimi yo‘lga qo‘yilishi rejalashtirilgan.
Mutasaddilar ta’kidlashicha, bu choralar orqali aholi haqiqiy arzonlashtirilgan mahsulotlardan bahramand bo‘lishi va savdo jarayonida adolat va shaffoflik ta’minlanishi ko‘zda tutilmoqda.
“Zamin”ni Telegramʻda oʻqing!
