Yaroqlilik muddati buzilgan yog‘ uchun iste’molchilarga milliardlab so‘m qaytariladi
O‘zbekiston fuqarolari tomonidan xarid qilingan “Oila tanlovi” savdo belgisi ostidagi kungaboqar moyining yaroqlilik muddati noto‘g‘ri ko‘rsatilgani aniqlanib, iste’molchilarga katta miqdorda kompensatsiya to‘lanadigan bo‘ldi. Ushbu mahsulot “Uzum” bozori orqali sotilgan va “Bo‘ston Food” kompaniyasi tomonidan ishlab chiqarilgan.
Raqobatni rivojlantirish va iste’molchilar huquqlarini himoya qilish qo‘mitasi o‘tkazgan tekshiruvda mahsulotdagi yaroqlilik muddati davlat standartlariga zid ravishda 12 oy deb yozilgani aniqlandi. Aslida, GOST 1129–2013 bo‘yicha bu turdagi yog‘ faqat 6 oy saqlanishi mumkin.
Shuningdek, yorliqda foydalanilgan texnik reglament — O‘zTR No 724 ko‘rsatilmagan. Qo‘mita bu holatni “Iste’molchilar huquqlarini himoya qilish to‘g‘risida”gi qonunning 6-moddasi buzilishi deb topdi.
Qanday choralar ko‘rilmoqda?
Maxsus komissiya ikki kompaniyaga quyidagi talablardan birini bajarishni majburiy qildi:
-
145 ming dona shishada sotilgan mahsulotni qaytarib olib, xaridorlarga 1,6 milliard so‘m (1 600 000 000 so‘m) kompensatsiya to‘lash yoki mahsulotni sifatlisi bilan almashtirish;
-
Agar xaridorlarni aniqlashning iloji bo‘lmasa, kompensatsiya summasini davlat byudjetiga o‘tkazish.
“Uzum Market” va “Bo‘ston Food Company” bu qarorga norozi bo‘lib sudga murojaat qildi, biroq sud ularning da’volarini rad etdi va qo‘mita qarorini o‘z kuchida qoldirdi.
Mutaxassislar bu holatni iste’molchi huquqlarini himoya qilishda muhim saboq deb baholamoqda.
“Zamin”ni Telegramʻda oʻqing!
