O‘zbekistonda bolalarni har qanday zo‘ravonlik va nomaqbul harakatlardan himoya qilish masalasi yanada kuchaytirilmoqda. Oliy Majlis Qonunchilik palatasida bo‘lib o‘tgan siyosiy partiyalar fraksiyalari yig‘ilishida mazkur masala yana markaziy muhokamaga aylandi.
Yig‘ilishda “Bolalarni zo‘ravonlikdan himoya qilish tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi ko‘rib chiqildi. Deputatlar ta’kidlashicha, so‘nggi yillarda bolalarni muhofaza qilish bo‘yicha amalga oshirilayotgan islohotlarga qaramay, ayrim salbiy holatlar hanuzgacha keskin kamaymayapti.
Ma’lumotlarga ko‘ra, joriy yilning dastlabki sakkiz oyi davomida voyaga yetmaganlarga nisbatan uyatsiz-buzuq xatti-harakatlar sodir etilishi 36 foizga ko‘paygan. Bu raqam mutaxassislar va jamoatchilik orasida katta tashvish uyg‘otmoqda.
Loyihaga ko‘ra, Jinoyat kodeksi va Ma’muriy javobgarlik to‘g‘risidagi kodeksga bir qator o‘zgartirish va qo‘shimchalar kiritilmoqda. Xususan, 16 yoshga to‘lmagan shaxslarga nisbatan telekommunikatsiya tarmoqlari va internetdan foydalanib sodir etilgan uyatsiz harakatlar uchun jazo choralari og‘irlashtiriladi.
Shuningdek, qonun loyihasida bolalarni jabrlanuvchi yoki guvoh sifatida so‘roq qilish jarayoniga ham aniq tartib kiritilmoqda. Endi bu jarayonning umumiy davomiyligi bir kundan oshmasligi belgilanyapti. Bu esa bolalarning ruhiy holatini asrab-avaylashda muhim ahamiyat kasb etadi. Shu bilan birga, so‘roq jarayonida ularning qonuniy vakillari yoki mas’ul shaxslari ham ishtirok etishi shart qilib belgilanmoqda.
Fraksiya a’zolaridan biri Sayyora Imomova ta’kidlaganidek, “Qonun loyihasi voyaga yetmagan farzandlarimizning huquq va manfaatlarini himoya qilishda muhim o‘rin tutadi”.
Yig‘ilishda bildirilgan takliflar asosida qonun loyihasini takomillashtirish bo‘yicha tegishli qarorlar qabul qilindi. Mutaxassislar fikricha, bunday choralar nafaqat bolalarni turli tahdid va zo‘ravonliklardan asrab qolish, balki jamiyatda mas’uliyat hissini kuchaytirishga ham xizmat qiladi.
“Zamin”ni Telegramʻda oʻqing!
