O‘zbekistonda hayvonlarga nisbatan shafqatsiz munosabat qilish holatlariga qarshi kurash kuchaymoqda. Oliy sud ma’lumotlariga ko‘ra, joriy yilning birinchi yarmida bu kabi huquqbuzarliklar bo‘yicha 34 nafar fuqaro javobgarlikka tortilgan.
Rasmiy ma’lumotlarga ko‘ra, ularning 32 nafariga jarima jazosi qo‘llanilgan bo‘lsa, yana ikki shaxs 15 sutkagacha ma’muriy qamoq bilan jazolangan. Sud matbuot kotibi ta’kidlashicha, hayvonlarni qasddan qiynash, ularga azob berish yoki ularning o‘limiga sababchi bo‘lish holatlariga nisbatan jazo choralari qat’iy belgilangan.
2020 yildan 2024 yilgacha bo‘lgan davrda Ma’muriy javobgarlik to‘g‘risidagi kodeksning 111-moddasi asosida jami 397 kishi javobgarlikka tortilgan. Ulardan 363 nafariga jarima qo‘llanilgan, 34 kishi esa ma’muriy qamoq jazosini o‘tagan.
Qonunchilikka ko‘ra, hayvonlarni qasddan qiynash yoki azob berish uchun nafaqat jarima, balki qamoq jazosi ham belgilangan. Agar bu kabi qilmish takroran sodir etilsa, jazo miqdori yanada og‘irlashadi. Shuningdek, 2021 yildan boshlab Jinoyat kodeksiga ham hayvonlarga nisbatan shafqatsiz munosabat uchun alohida modda kiritilgan.
Oliy sudning ta’kidlashicha, bu kabi choralar nafaqat hayvonlarni himoya qilish, balki jamiyatda insonparvarlik va mas’uliyat tuyg‘usini mustahkamlash uchun ham juda muhim. Mutaxassislar fikricha, jonzotlarga nisbatan shafqatsizlik ko‘rsatgan odamlar jamiyat xavfsizligi uchun ham tahdiddir.
Eslatib o‘tamiz, avvalroq Buxoroda tor qafasda saqlanayotgan ayiq haqida jamoatchilik orasida keng muhokamalar bo‘lgan edi. Tanqidlardan so‘ng hayvon kattaroq maydonga ko‘chirilgan. Faollarning ta’kidlashicha, u 10 kundan ziyod noqulay sharoitda yashashga majbur bo‘lgan.
Mutasaddilar bu holat jamiyatda hayvonlarga insoniy munosabat qilish masalasi qanchalik dolzarb ekanini yana bir bor ko‘rsatganini qayd etmoqda.
“Zamin”ni Telegramʻda oʻqing!
