Kecha, 23 sentyabr kuni, O‘zbekiston Prezidenti Shavkat Mirziyoyev BMT Bosh Assambleyasining 80-yubiley sessiyasi doirasida Chexiya Prezidenti Petr Pavel bilan tarixiy ilk uchrashuv o‘tkazdi. Bu haqda O‘zbekiston rahbarining matbuot xizmati xabar berdi.
Uchrashuv davomida ikki davlat o‘rtasidagi savdo-iqtisodiy hamkorlikni kengaytirish masalalari muhokama qilindi. Alohida e’tibor investitsiyalar, innovatsiyalar, transport infratuzilmasi va qishloq xo‘jaligi sohalaridagi hamkorlik loyihalariga qaratildi. Shuningdek, uchrashuvda ikki mamlakat idoralararo aloqalarni faol ravishda rivojlantirishga kelishib olingani ham ta’kidlandi.
Muloqot davomida tomonlar, shuningdek, madaniy, ta’lim va texnologik sohalarda ham hamkorlik imkoniyatlarini kengaytirishga tayyor ekanliklarini bildirishdi. Bu uchrashuv nafaqat ikki davlat rahbarlari o‘rtasidagi munosabatlarni mustahkamlash, balki ikki mamlakat xalqlari va biznes doiralari o‘rtasidagi hamkorlikni yanada rivojlantirishda muhim qadam sifatida baholandi.
Ma’lumot uchun, Shavkat Mirziyoyev va Petr Pavel o‘rtasidagi ushbu uchrashuv birinchi hisoblanadi. Bu vaqtga qadar Prezidentlar yuzma-yuz ko‘rishmagan edilar. Tadbir yaqin kelajakdagi strategik hamkorlik va qator qo‘shma loyihalar uchun muhim poydevor bo‘lib xizmat qiladi.
“Zamin”ni Telegramʻda oʻqing!
