Namangan viloyati Norin tumani hokimining yaqinda Prezident tashrifidan so‘ng ko‘chib o‘tgan uyi darvozasiga fuqaro tomonidan qo‘lda yozilgan xat topildi. Ijtimoiy tarmoqlarda tarqalgan xabarlarga ilova qilingan rasmlarda xatning mazmuni ham aks ettirilgan.
Xatda fuqaro Salima Qo‘ldosheva hokim Jo‘rabek Nurmatovga murojaat qilgan: «Hurmatli hokim, sizning qaroringiz tufayli biz oilaviy uysiz qoldik. Onam sarson-sargardonlikda vafot etdi. Men turmush qurganman, ukam esa hanuz uysiz, uylanolmay, vatanga hissa qo‘sha olmay yuribdi. Ishonamizki, siz qachondir o‘z uyingizga qaytasiz, biz esa 13 yildan beri qaytolmayapmiz. Hurmat bilan, Qo‘ldosheva Salima», – deb yozilgan.
24 sentyabr kuni Norin tumani hokimligi ushbu xat bo‘yicha rasmiy izoh berdi. Hokimlikdan ma’lum qilishlaricha, xat yuzasidan ishchi guruhi tekshiruv olib borgan va fuqaro bilan uchrashuv tashkil qilingan. Aniqlanishicha, Qo‘ldosheva avval hokim yoki hokimlikka murojaat qilmagan bo‘lib, ushbu xat orqali o‘z muammolari bilan chiqishi avvaldan o‘rganilgan. Hozirda tuman hokimi tomonidan Salima Qo‘ldoshevaga amaliy yordam ko‘rsatish choralari ko‘rilmoqda, shu jumladan «Ayollar daftari»ga ro‘yxatga kiritilgan.
Hokimlik xabarida qayd etilishicha, ukasi A. Qo‘ldoshev xorijda bo‘lgani sababli mahalla yoshlar yetakchisi ishtirokida videoaloqa orqali gaplashilgan va 10 kun ichida migratsiyadan qaytarish hamda muammolarini hal qilish choralari ko‘rilmoqda.
Shuningdek, ilgari Namangan viloyat hokimligi tomonidan hokimning konteyner uyga ko‘chib o‘tgani haqida xabar berilgan bo‘lsa-da, ijtimoiy tarmoqlarda xat yozilgan uy konteyner uy emasligi va atrofi qo‘rg‘on qilib o‘ralganligi ko‘rish mumkin.
Bu voqea ijtimoiy tarmoqlarda keng muhokama qilinayotgan bo‘lib, aholi va fuqarolar e’tiborini mahalliy hokimiyat organlari va ijtimoiy adolat masalalariga qaratmoqda.
“Zamin”ni Telegramʻda oʻqing!
