O‘zbekistonda 2025 yil 1 oktyabrdan qator muhim o‘zgarishlar amalga kiritiladi. Bu o‘zgarishlar qonunchilik, yo‘l harakati xavfsizligi, sport infratuzilmasi, sud tizimi, bojxona hamda ekologik sohalarni qamrab oladi. Ular oddiy fuqarolar hayotiga ham, butun tizim ishlash jarayoniga ham to‘g‘ridan to‘g‘ri ta’sir ko‘rsatishi kutilmoqda.
Moped va skuter uchun yangi talablar
Endi moped yoki skuter haydash uchun albatta davlat raqami va haydovchilik guvohnomasi talab qilinadi. Ilgari bu qoida 1 martdan kuchga kirishi belgilangan edi, ammo muddat uzaytirildi. 1 oktyabrdan boshlab har qanday moped yoki skuterni haydash uchun ular davlat ro‘yxatidan o‘tkazilishi, raqam olinishi va “A” toifali haydovchilik guvohnomasiga ega bo‘lish shart bo‘ladi.
Chiroyli raqamlarni olish tartibi o‘zgaradi
Shu kundan boshlab “chiroyli raqam”lar uchun auksion savdolari bekor qilinadi. Endi ular yagona to‘lov evaziga beriladi. Bu miqdorni “Uzavtomotobelgi” belgilaydi. 2026 yil 1 yanvardan esa raqam tanlash jarayoni yanada soddalashib, onlayn tartibda ochiq ma’lumotlar bazasi orqali istalgan raqam kombinatsiyasini tanlash mumkin bo‘ladi.
“Har bir mahallada futbol maydoni” dasturi
Prezident qaroriga ko‘ra, mahallalarda futbol maydonlari qurish dasturi yo‘lga qo‘yiladi. Bo‘sh turgan yer maydonlari elektron auksion orqali taklif qilinadi va ularda stadionlar qurilib, kamida 10 yil davomida boshqa maqsadda foydalanilishiga yo‘l qo‘yilmaydi. Bu qadam yoshlar o‘rtasida sportni ommalashtirish va infratuzilmani yaxshilashga qaratilgan.
Odil sudlov akademiyasi tashkil etiladi
Sudyalar oliy maktabi negizida yangi akademiya tashkil etiladi. U yerda sudyalikka nomzodlar uchun 6 oylik kurslar bo‘ladi. Davlat granti asosida o‘quvchilarga stipendiya to‘lanadi va kursni muvaffaqiyatli yakunlaganlar sudyalik lavozimlariga tanlovlarda ishtirok etadi.
Tovarlar uchun “Yagona darcha” tizimi
Endilikda barcha import, eksport va tranzit tovarlarni rasmiylashtirish uchun kerakli ruxsat va sertifikat hujjatlari faqat “Yagona darcha” bojxona tizimi orqali amalga oshiriladi. Bu tadbirkorlar uchun ortiqcha qog‘ozbozlikni qisqartiradi.
Subsidiya va grantlar ijtimoiy karta orqali
Fuqarolarga beriladigan subsidiya va grantlar endi bosqichma-bosqich maxsus ijtimoiy kartalar orqali taqdim etiladi. Bu tartib mablag‘larni aniq maqsadga yo‘naltirishga yordam beradi.
“Yashil sertifikat” majburiy bo‘ladi
Ishlab chiqarish jarayonlari atrof-muhitga ta’sir ko‘rsatishi mumkin bo‘lgan I va II toifaga kirsa, korxonalar majburiy ravishda “Yashil sertifikat”ga ega bo‘lishi kerak. Bu sertifikat 2026 yil iyulgacha shartnoma tuzgan korxonalar uchun tekin beriladi.
“Zamin”ni Telegramʻda oʻqing!
