O‘zbekistonda mahalliy davlat boshqaruv tizimini samarali tashkil etish, ortiqcha tuzilmalarni qisqartirish va faoliyatni shaffof qilish maqsadida yangi tartib joriy etilishi kutilmoqda. Prezident Farmoni loyihasi ishlab chiqilib, jamoatchilik muhokamasiga taqdim etildi. Bu haqda O‘zA axborot agentligi ma’lumot berdi.
Loyihaga ko‘ra, 2026 yil yakuniga qadar mamlakat bo‘ylab 32 ta tuman va shaharda hokimliklar faoliyatining yangi tizimi joriy etiladi. Yangicha yondashuv asosida qator vazirlik va idoralarning hududiy bo‘linmalari hokimlik tarkibiga kiritilishi belgilangan.
Xususan, quyidagi tuzilmalar tuman va shahar hokimliklari tarkibiga o‘tkaziladi:
• Iqtisodiyot va moliya vazirligi
• Investitsiyalar, sanoat va savdo vazirligi
• Qishloq xo‘jaligi vazirligi
• Kambag‘allikni qisqartirish va bandlik vazirligi
• Qurilish va uy-joy kommunal xo‘jaligi vazirligi
• Ekologiya, atrof-muhitni muhofaza qilish va iqlim o‘zgarishi vazirligi
• Madaniyat vazirligi
• Oila va xotin-qizlar qo‘mitasi
• Yoshlar ishlari agentligi
Shu bilan birga, hokimliklardagi lavozimlar soni ham qisqartirilishi rejalashtirilmoqda. Hozirgi kunda har bir tuman va shahar hokimi 6 nafar o‘rinbosarga ega bo‘lsa, yangi tartibga ko‘ra, ularning soni 4 nafar etib belgilanadi. Bu orqali bir tomondan mas’uliyat va hisobdorlik kuchayishi, ikkinchi tomondan ortiqcha byurokratiyaning oldi olinishi ko‘zda tutilmoqda.
Mutaxassislar ta’kidlashicha, mahalliy hokimliklardagi tuzilmalarni isloh qilish aholining davlat organlari bilan munosabatini soddalashtirib, qaror qabul qilish jarayonlarini tezlashtiradi. Shu bilan birga, bu qadam korrupsiya xavfini kamaytirishga ham xizmat qiladi.
Hujjatning yakuniy tasdig‘i va amalga oshirilishi orqali hokimliklar faoliyati sifat jihatdan yangi bosqichga ko‘tarilishi kutilmoqda.
“Zamin”ni Telegramʻda oʻqing!
