O‘zbekistonda transport infratuzilmasini himoya qilish va yo‘l harakati xavfsizligini oshirish maqsadida og‘ir yuk mashinalari uchun maxsus davlat raqamlari joriy etiladi. So‘nggi yillarda mamlakatda yuk avtomobillari soni keskin ortib, oxirgi 15 yil ichida qariyb uch baravar ko‘paygan. Bu esa yo‘llarga bosimni kuchaytiradi, ularning tezroq eskirishini va yo‘l-transport hodisalarining sonining ko‘payishini keltirib chiqarmoqda.
2026 yil 1 yanvardan boshlab, yalpi og‘irligi 44 tonnadan yuqori bo‘lgan yuk transporti vositalari hamda karerlarda foydalaniladigan yirik samosvallar uchun alohida davlat raqamlari joriy qilinadi. Yangi raqamlar qizil fonli bo‘lib, oq harf va raqamlardan iborat “YUK” seriyasida taqdim etiladi. Ularning chap tomonida hudud kodi, o‘ng tomonida esa davlat bayrog‘i va “UZ” belgisi aks etadi.
Mutaxassislar ta’kidlashicha, bu tizim qator afzalliklarga ega:
Yo‘l inspektorlari eng og‘ir transport vositalarini tezda ajratib olish imkoniyatiga ega bo‘ladi;
Yo‘llarning haddan tashqari yuklanishi oldi olinadi va ularning tez eskirishi kamayadi;
Transport oqimi va tirbandlik tartibga solinadi;
Yo‘llarda baxtsiz hodisalar soni qisqaradi va xavfsizlik oshadi.
Shuningdek, yuk mashinalarini tungi vaqtda yo‘l chetida qoldirganlik uchun jazoni kuchaytirish ham taklif qilinmoqda. Statistikaga ko‘ra, faqat 2024 yilda shunday holatlar sababli 113 ta YTH sodir bo‘lgan va 47 kishi hayotdan ko‘z yumgan.
Yangi tizim nafaqat yo‘l infratuzilmasi xavfsizligini ta’minlaydi, balki og‘ir transport vositalari va ularni boshqaruvchi shaxslar ustidan aniq hisob yuritishni ham osonlashtiradi, shu bilan transport nazorati va xavfsizlikni yanada kuchaytiradi.
“Zamin”ni Telegramʻda oʻqing!
