Finlyandiya prezidenti Oʻzbekistonga ilk rasmiy tashrif bilan keladi

Finlyandiya prezidenti Aleksandr Stubb joriy yilning oktyabr oyi oxirida Oʻzbekistonga ilk rasmiy tashrifini amalga oshiradi. Finlyandiya rahbarining matbuot xizmati maʼlum qilishicha, tashrif 30–31 oktyabr kunlari boʻlib oʻtadi.

31 oktyabr, juma kuni Toshkent shahrida Finlyandiya prezidenti Aleksandr Stubb va Oʻzbekiston prezidenti Shavkat Mirziyoyev oʻrtasida rasmiy muzokaralar tashkil etiladi. Uchrashuvda ikki mamlakat oʻrtasidagi hamkorlikning yangi bosqichi, savdo va investitsiya munosabatlari, shuningdek, global geosiyosiy masalalar muhokama qilinishi rejalashtirilgan.

Prezident tashrifi doirasida biznes-seminar, Jahon iqtisodiyoti va diplomatiya universitetida maʼruza, hamda tashqi siyosat sohasidagi ekspertlar bilan uchrashuv ham oʻtkaziladi. Bu tadbirlar ikki davlat oʻrtasida iqtisodiy va ilmiy aloqalarni mustahkamlashga xizmat qiladi.

Finlyandiya delegatsiyasi tarkibida parlament deputati, parlamentning Oʻzbekiston bilan doʻstlik guruhi raisi Ville Skinnari va bir qator yirik fin kompaniyalari vakillari ham ishtirok etadi. Bu hamkorlik, ayniqsa, “yashil energiya”, texnologik investitsiyalar va taʼlim sohasida yangi loyihalarni amalga oshirish imkonini yaratadi.

Taʼkidlanishicha, Finlyandiya prezidentining Oʻzbekistonga bunday darajadagi soʻnggi tashrifi 1992 yilda — sobiq prezident Mauno Koivisto tomonidan amalga oshirilgan edi. Oradan 33 yil oʻtgandan keyin amalga oshadigan bu tashrif ikki davlat munosabatlarida yangi sahifani ochishi kutilmoqda.

Shavkat Mirziyoyev tashrif arafasida Aleksandr Stubb bilan telefon orqali suhbatlashib, savdo-iqtisodiy va gumanitar sohalardagi hamkorlik yoʻnalishlarini muhokama qilgani maʼlum qilindi. Prezidentlar ikki mamlakat oʻrtasidagi doʻstlik va ishonchli sheriklikni yanada rivojlantirish niyatini bildirgan.

Aleksandr Stubbning Toshkentga kelishi nafaqat rasmiy muzokaralar, balki Finlyandiya va Oʻzbekiston oʻrtasidagi uzoq muddatli strategik aloqalarni mustahkamlash yoʻlida muhim qadam sifatida baholanmoqda.