21 oktyabr kuni kechasi Afg‘oniston hududida sodir bo‘lgan zilzila O‘zbekistonning bir nechta viloyatlarida ham his qilindi. Bu haqda Seysmoprognostik monitoring Respublika markazi ma’lum qildi.
Ma’lumotlarga ko‘ra, zilzila Toshkent vaqti bilan soat 23:14 da qayd etilgan. Uning epitsentri Badaxshon viloyatida, Toshkentdan taxminan 556 kilometr janubiy-sharqda joylashgan. Zilzilaning magnitudasi 6 ball, chuqurligi esa 225 kilometr bo‘lgan.
O‘zbekiston hududidagi seysmik faollik asosan yengil darajada sezilgan. Xususan, Surxondaryo viloyatida tebranish kuchi 3 ball atrofida qayd etilgan. Farg‘ona, Sirdaryo, Andijon, Jizzax, Samarqand, Namangan va Qashqadaryo viloyatlarida 2–3 balllik seysmik ta’sir kuzatilgan. Poytaxt Toshkentda esa yer osti tebranishlari 2 ball darajasida bo‘lgan.
Hozircha zilzila oqibatida qurbonlar yoki zararlar haqida ma’lumot berilmagan. Mutaxassislar Afg‘oniston shimolidagi faol tektonik hududlarda so‘nggi oylarda zilzilalar soni ko‘payganini qayd etmoqda.
Ekspertlar fuqarolarni shoshma-shoshar harakat qilmaslikka va rasmiy manbalar orqali ma’lumotlarni kuzatib borishga chaqirdi.
“Zamin”ni Telegramʻda oʻqing!
