Ertaga, 23 oktyabr kuni Prezident Shavkat Mirziyoyev rasmiy tashrif bilan Belgiya poytaxti Bryusselga yo‘l oladi. Bu haqda davlat rahbarining matbuot xizmati ma’lum qildi.
Tashrif Yevropa kengashi raisi Antoniu Koshta va Yevropa komissiyasi prezidenti Ursula fon der Lyayenning taklifiga binoan amalga oshiriladi.
Prezident Mirziyoyev Bryusselda Yevropa Ittifoqining yetakchi institutlari rahbarlari bilan ikki tomonlama muzokaralar o‘tkazishi rejalashtirilgan. Uchrashuvlarda Samarqanddagi so‘nggi sammitda erishilgan kelishuvlarni amalga oshirish, shuningdek, savdo, investitsiya, innovatsiya, energetika va fan-ta’lim sohalaridagi hamkorlikni kengaytirish masalalari muhokama etiladi.
Tashrif doirasida O‘zbekiston va Yevropa Ittifoqi o‘rtasida kengaytirilgan sheriklik va hamkorlik to‘g‘risidagi yangi bitimni imzolash ham kutilmoqda.
Shuningdek, Prezident Mirziyoyev Belgiya rahbariyati bilan uchrashib, Yevropa kompaniyalari va banklari rahbarlari bilan sanoat va texnologiya sohasidagi qo‘shma loyihalarni muhokama qiladi.
Davlat rahbarining matbuot xizmati ma’lum qilishicha, mazkur tashrif O‘zbekistonning Yevropa bilan munosabatlarini yangi bosqichga olib chiqishga xizmat qiladi.
“Zamin”ni Telegramʻda oʻqing!
