Prezident Shavkat Mirziyoyev AQSH Prezidentining Janubiy va Markaziy Osiyo bo‘yicha maxsus vakili Serjio Gor boshchiligidagi delegatsiyani qabul qildi, deb xabar berdi Prezident matbuot xizmati.
Uchrashuvda AQSH Davlat kotibining o‘rinbosari Kristofer Landau va boshqa rasmiylar ham ishtirok etdi. Suhbat chog‘ida ikki mamlakat o‘rtasidagi strategik sheriklikni rivojlantirish va Nyu-Yorkda 23 sentyabr kuni oliy darajada imzolangan kelishuvlarni amalga oshirish masalalari muhokama qilindi.
Serjio Gor uchrashuv avvalida Donald Trampning Prezident Mirziyoyevga yo‘llagan salomi va samimiy tilaklarini yetkazdi. Suhbat yakunida esa u Tramp nomidan bir qator sovg‘alar, jumladan shaxsiy kepkani topshirdi.
Tomonlar sanoat, energetika, raqamlashtirish, qishloq xo‘jaligi va moliya sohalaridagi hamkorlikni kengaytirish muhim ekanini ta’kidladi. Shuningdek, xavfsizlik, terrorizmga qarshi kurash, migratsiya va mintaqaviy barqarorlik bo‘yicha hamkorlik masalalari ko‘rib chiqildi.
Kelgusi hafta Vashingtonda bo‘lib o‘tadigan S5+1 sammiti tayyorgarligi ham muhokama qilindi.
Ma’lumot uchun, Serjio Gor — Toshkentda tug‘ilgan siyosatchi bo‘lib, Donald Trampning yaqin hamfikrlaridan biri hisoblanadi. U avval Oq uyda kadrlar boshqarmasi direktori sifatida ishlagan va 2025 yilda Tramp tomonidan Hindistondagi elchi lavozimiga nomzod etib ko‘rsatilgan.
Hozirda u AQSHning Janubiy va Markaziy Osiyo bo‘yicha maxsus vakili sifatida faoliyat yuritmoqda.
“Zamin”ni Telegramʻda oʻqing!
