O‘zbekistonda giyohvandlikka qarshi kurashda yangi tizim joriy etiladi. Endi narkotik vositalarning noqonuniy aylanmasi haqida xabar bergan yoki uni aniqlashga yordam ko‘rsatgan fuqarolar maxsus mukofot bilan taqdirlanadi, deb xabar berdi hukumat manbalari.
Prezident farmoniga muvofiq, rag‘batlantirish tartibini Narkotiklar va o‘qotar qurollarni nazorat qilish agentligi ishlab chiqadi va Vazirlar Mahkamasiga taqdim etadi. Bu chora fuqarolarning faol ishtiroki orqali giyohvandlikka qarshi kurashni kuchaytirishni maqsad qiladi.
Shuningdek, Ichki ishlar vazirligi 2025 yil oxirigacha profilaktika inspektorlarini noqonuniy narkolaboratoriya va qadoqlash sexlarini aniqlash bo‘yicha tayyorlashni tashkil etadi. Samarali ishlagan xodimlar budjetdan tashqari mablag‘lar hisobidan rag‘batlantiriladi.
2026 yil 1 martgacha ichki ishlar organlari uchun narkotik vositalarni tezkor aniqlaydigan zamonaviy uskunalar xarid qilinishi rejalashtirilgan.
Bundan tashqari, psixotrop va kuchli ta’sir etuvchi moddalar aylanmasiga qarshi choralar kuchaytiriladi. Yoshlar ishtirokidagi jinoyatlar uchun esa alohida qat’iy javobgarlik belgilanishi kutilmoqda.
Yangi tashabbus nafaqat jinoyatchilikka qarshi kurashish, balki jamiyatning ongli ishtirokini ta’minlashga ham qaratilgan.
“Zamin”ni Telegramʻda oʻqing!
