O‘zbekistonning rasmiy oltin-valyuta zaxiralari so‘nggi yillarda kuzatilmagan darajada o‘sdi. Markaziy bank ma’lumotlariga ko‘ra, 2025 yil 1 noyabr holatida mamlakatning xalqaro zaxiralari 59,3 milliard dollarga yetgan, deb xabar berdi Spot.uz. Bu ko‘rsatkich mamlakat tarixidagi eng yuqori natija sifatida qayd etildi.
Markaziy bank hisobotida ta’kidlanishicha, zaxiralar bir oy ichida 4,3 milliard dollarga oshgan. Bu o‘sish, asosan, jahon bozorida oltin narxlarining yil boshidan buyon qariyb 50 foizga ko‘tarilgani bilan bog‘liq.
Oktyabr oyida valyutalar hisobi 731 million dollarga oshgan bo‘lsa, oltin zaxiralari qiymati 3,6 milliard dollarga ko‘payib, 47,8 milliard dollarga yetgan. Shuningdek, oltinning jismoniy hajmi ham ortib, 11,6 million troya unsiyadan 11,9 million unsiyagacha ko‘tarilgan.
Markaziy bank balansidagi qimmatli qog‘ozlar portfeli ham biroz o‘sib, 1 milliard 23 million dollarni tashkil etgani qayd etilgan.
Mutaxassislar oltin narxlaridagi keskin o‘sishni jahon bozorlaridagi beqarorlik, geosiyosiy ziddiyatlar va AQSH Federal rezerv tizimining siyosiy o‘zgarishlari bilan izohlamoqda.
Iqtisodchilar ta’kidlashicha, bu holat O‘zbekistonning moliyaviy barqarorligini mustahkamlash va tashqi shoklarga qarshi turish imkonini yanada kuchaytirishi mumkin.
“Zamin”ni Telegramʻda oʻqing!
