Toshkent jamoat transportida jiddiy o‘zgarishlar boshlanmoqda — poytaxtda avtobuslarning o‘rtacha harakat tezligi sezilarli oshiriladi. Prezident qaroriga ko‘ra, endilikda avtobuslar 18 km/soat o‘rniga 24 km/soat tezlikda harakatlanishi belgilanmoqda. Bu nafaqat vaqtni tejash, balki yo‘llardagi tirbandliklarni kamaytirishga qaratilgan islohotlarning bir qismi sanaladi.
Tasdiqlangan yo‘l xaritasiga muvofiq, 2030 yilgacha Toshkent transport tizimida bir qator katta maqsadlar qo‘yilgan. Jumladan, aholining jamoat transportidan foydalanish darajasini 60 foizga yetkazish, poytaxt bo‘ylab 150 ming o‘rinli avtoturargohlar barpo etish va metro tarmog‘ini 103 kilometrgacha kengaytirish rejalashtirilgan.
Shuningdek, Toshkentda Yo‘l harakatini tashkil etish markazi tashkil etiladi. U transport oqimlari, piyodalar harakati va jamoat transportini zamonaviy raqamli texnologiyalar asosida doimiy monitoring qilib boradi.
Markazning vazifalari orasida yana quyidagilar bor:
— poytaxtning to‘laqonli transport master-rejasini ishlab chiqish;
— shaharga kiruvchi asosiy yo‘llarda avtobus va metroni bog‘lovchi ko‘p qavatli parkovkalar qurish;
— yerusti metro liniyalari va yo‘lo‘tkazgichlar ostida xavfsiz avtoturargohlar barpo etish.
Ushbu o‘zgarishlar Toshkent yo‘llarida harakatni yengillashtirishi, jamoat transportini barqaror va tezkor qilishini mutasaddilar ta’kidlayapti. Shahar transport tizimi yaqin yillarda mutlaqo yangi bosqichga ko‘tarilishi kutilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
