O‘zbekiston turizm sohasi bu yil yangi bosqichga ko‘tarildi — 11 oy davomida mamlakatga 10,7 million xorijiy mehmon keldi. Bu natija o‘tgan yilga nisbatan ancha yuqori bo‘lib, turizm xizmatlari eksporti 4,4 milliard dollargacha yetdi. Mamlakat targ‘iboti, vizasiz rejimlar va transport qulayliklari yil davomida barqaror o‘sishni ta’minladi.
Ichki turizm ham katta sur’at bilan rivojlandi. “O‘zbekiston bo‘ylab sayohat qil” dasturi doirasida fuqarolarning ichki safarlari 23,7 million marta amalga oshirildi. Bu belgilangan rejadan ham yuqori ko‘rsatkich sanaladi.
Hududlarda turistik infratuzilma tezkor rivojlanmoqda:
— 954 ta yangi mehmonxona ishga tushirilib, umumiy soni 6861 taga yetdi;
— joylashuv o‘rinlari 183,9 mingtagacha kengaydi;
— 662 ta yangi turagentlik tashkil etildi;
— mamlakat bo‘ylab 4345 nafar gid faoliyat yuritmoqda, yil davomida yana 375 ta yangi mutaxassis tayyorlandi.
Turistik biznesni qo‘llab-quvvatlash choralari natijasida yuzlab sanitatsiya-gigiyena shoxobchalari yangilandi, 421 ta investitsiya loyihasi amalga oshirildi va 6000 dan ortiq yangi ish o‘rinlari yaratildi.
Yil yakunlari shuni ko‘rsatmoqdaki, turizm O‘zbekiston iqtisodiyotidagi eng yuqori o‘sish drayverlaridan biriga aylanmoqda. Raqobatbardoshlik oshmoqda, yangi xizmatlar, yo‘nalishlar va imkoniyatlar esa xalqaro mehmonlar oqimini yanada ko‘paytirishi kutilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
