Prezident Shavkat Mirziyoyev AQSH Prezidenti Donald Tramp taklifiga binoan 21 yanvar kuni Davos shahrida o‘tadigan Tinchlik kengashi nizomini imzolash marosimida ishtirok etish uchun Shveysariyaga amaliy tashrif bilan jo‘nab ketdi. Avvalroq O‘zbekiston mazkur tuzilmaga ta’sischi davlat sifatida qo‘shilish taklifini qabul qilgani aytilgan.
Ma’lum qilinishicha, tashabbusning asosiy g‘oyasi — G‘azoda uzoq muddatli tinchlik, barqarorlik va xavfsizlikni ta’minlashga tayyor davlatlarni bir platforma atrofida jamlab, yangi xalqaro tuzilma shakllantirishdan iborat.
Manbalarga ko‘ra, Tinchlik kengashi nizomiga imzo qo‘yish marosimi aynan Davosda bo‘lib o‘tishi kutilmoqda, hozircha bir qator davlatlar qo‘shilishga rozilik bildirgani ham tilga olinmoqda.
Mirziyoyev Trampga yo‘llagan maktubida ushbu tashabbus Yaqin Sharqdagi ko‘p yillik mojarolarga yechim izlash, keng mintaqada tinchlik va barqarorlikni mustahkamlash yo‘lida muhim qadam sifatida baholanayotganini ta’kidlagani keltiriladi.
Endi eng qiziq nuqta — natija. Agar yangi tuzilma qog‘ozda qolib ketmay, real mexanizmlarga aylansa, O‘zbekiston uchun bu xalqaro maydondagi ta’sir va diplomatik ishtirokni kuchaytirish imkoniyatiga aylanishi mumkin. Agar aylanmasa — bari PR bo‘lib qolishi xavfi ham bor. Har ikki ssenariyda ham Davosdagi uchrashuvlar keyingi oylarda ko‘p narsaga ton berishi turgan gap.
“Zamin”ni Telegramʻda oʻqing!
