Markaziy saylov komissiyasi E. Turdimovning Oliy Majlis Senati a’zoligi vakolatini muddatidan oldin tugatish haqida qaror qabul qildi. Ushbu qaror amaldagi qonunchilik talablariga to‘liq muvofiq ravishda qabul qilingani ta’kidlanmoqda.
Konstitutsiyaga ko‘ra, Oliy Majlis Senati a’zolari xalq deputatlari viloyat, tuman va shahar Kengashlari deputatlari orasidan saylanadi. Ya’ni senatorlik maqomi mahalliy Kengash deputatligi bilan bevosita bog‘liq hisoblanadi.
Agar senator qandaydir sababga ko‘ra o‘zining Kengash deputati sifatidagi vakolatini yo‘qotsa, u avtomatik tarzda Senat a’zoligidan ham mahrum bo‘ladi. Bu holat qonun bilan aniq belgilab qo‘yilgan.
Mazkur vaziyatda E. Turdimov Sirdaryo viloyati hokimi etib tayinlangani sababli Samarqand viloyati Kengashi deputati sifatidagi maqomini yo‘qotgan. Shu bilan birga, senatorlik vakolati ham qonunan tugatilgan.
Qayd etilishicha, agar Turdimov keyinchalik Sirdaryo viloyati Kengashiga deputat etib saylansa, amaldagi tartibga muvofiq u qaytadan senator etib saylanishi mumkin.
Shu tariqa, senatorlik alohida va mustaqil unvon emas, balki mahalliy vakillik organidagi deputatlik vakolati bilan uzviy bog‘liq bo‘lib, qonunchilikda bu munosabatlar aniq tartibga solingan.
“Zamin”ni Telegramʻda oʻqing!
