Prezident Olmazor tumanidagi zamonaviy klinika faoliyati bilan tanishdi
8
Prezident Shavkat Mirziyoyev Toshkent shahrining Olmazor tumanida joylashgan «Sinomed» ko‘p tarmoqli tibbiyot markaziga tashrif buyurib, muassasa ish jarayoni, bemorlar uchun yaratilgan sharoitlar hamda shifokor va farmatsevtlarning salohiyatini ko‘zdan kechirdi. Bu haqda uzdaily.uz xabar beradi.
Tashrif chog‘ida xususiy sektor sog‘liqni saqlash tizimidagi o‘rni alohida qayd etildi: mamlakatda tibbiy xizmatlarning qariyb 30 foizi xususiy klinikalar hissasiga to‘g‘ri keladi. Davlat tomonidan xususiy tibbiyotni qo‘llab-quvvatlash va uning rivoji uchun qo‘shimcha sharoitlar yaratish ustuvor yo‘nalishlardan biri ekani ta’kidlandi. Shu ma’noda «Sinomed» kabi markazlar sifatli tibbiy yordam ko‘rsatish imkoniyatlarini kengaytiradi.
Markaz akusherlik, pediatriya, jarrohlik, travmatologiya, ortopediya, endokrinologiya kabi yo‘nalishlar bo‘yicha xizmatlar ko‘rsatadi. Loyiha qiymati 30 million AQSh dollarini tashkil etgan, tibbiy uskunalar Buyuk Britaniya, Italiya, Yaponiya va Germaniyadan keltirilgan.
«Sinomed» tarkibida ambulator va statsionar bo‘limlar faoliyat yuritadi, yiliga 4500 nafargacha bemorni qabul qilish quvvatiga ega. Bu yerda 300 dan ortiq ish o‘rni yaratilgan, 80 dan ziyod shifokor ishlaydi. Ulardan 60 dan ortig‘i Janubiy Koreya, Germaniya, Turkiya, Hindiston, Yaponiya va AQShda malaka oshirgan. Klinikaga xorijiy mutaxassislar ham jalb qilinmoqda.
Muassasada onalik va bolalik masalalariga alohida e’tibor qaratilgan. Markazda Toshkentdagi ilk xususiy tug‘ruq majmuasi ishga tushirilgan bo‘lib, bir vaqtning o‘zida 30 nafar ayolga xizmat ko‘rsatish imkoniyatiga ega, kelgusida o‘rinlar sonini oshirish rejalashtirilgan. Shuningdek, bolalar uchun emlash va profilaktik ko‘riklar yo‘lga qo‘yilgan, koll-markazlar hamda patroj guruhlari tashkil etilgan, bemorlarni uyiga borib ko‘rish amaliyoti yo‘lga qo‘yilgan.
Markaz respublikadagi eng yirik xususiy vaksinalash markaziga hamda xususiy sektorda yagona sterilizatsiya markaziga ega ekani qayd etildi.
Prezident ambulator xonalar, bemorlar uchun yaratilgan sharoitlar va ayollarni homiladorlik, tug‘ruq hamda tug‘ruqdan keyingi davrning barcha bosqichlarida kuzatib borish tizimi bilan tanishdi. Davlat rahbari muntazam tug‘ruqqacha nazorat va o‘z vaqtida tibbiy yordam, ayniqsa ilk farzand tug‘ilishida, jarayon ona uchun ortiqcha stressga aylanmasligi zarurligini ta’kidladi.
Klinika jamoasi bilan muloqotda Shavkat Mirziyoyev xususiy tibbiyotda raqobat muhimligini qayd etdi: xususiy tibbiyot markazlari ko‘paygani sari aholida tanlov kengayadi, natijada xizmat sifati va davolanish xarajatlariga moslik kuchayadi. Tashrif davomida Prezident markaz hududida tashkil etilgan maydonchada o‘ynayotgan bolalar bilan ham suhbatlashib, xususiy klinikalar zamonaviy standartlarni joriy etish, malakali kadrlar tayyorlash va yuqori darajadagi tibbiy xizmat ko‘rsatishda muhim o‘rin tutishini ta’kidladi.
“Zamin”ni Telegramʻda oʻqing! 
