O‘zbekistonda kelasi hafta ob-havo keskin o‘zgarishi kutilmoqda. “O‘zgidromet” prognozlariga ko‘ra, 9–12 mart kunlari respublika hududiga sovuq va nam havo oqimlari kirib keladi. Shu bois ko‘p hududlarda yog‘ingarchilik kuzatilib, ayrim joylarda yomg‘ir qorga aylanishi mumkin.
Sinoptiklar ma’lumotiga ko‘ra, 9–11 mart kunlari mamlakat bo‘ylab vaqti-vaqti bilan yomg‘ir yog‘adi, ba’zi hududlarda esa qor aralash yog‘ingarchilik kuzatilishi ehtimol. Tog‘ oldi va tog‘li joylarda yog‘ingarchilik kuchayishi, ayrim nuqtalarda esa sel-suv toshqini xavfi yuzaga kelishi mumkin.
Shamol ham kuchayishi kutilmoqda. Ayrim hududlarda uning tezligi sekundiga 15–20 metrgacha yetishi, ba’zi joylarda esa 22–25 metr/sekundgacha kuchayishi mumkin. Bu esa havodagi sovuqni yanada kuchliroq sezdirishi tayin.
Eng katta sovuq 10–12 mart kunlari seziladi. Respublika shimolida kechasi havo 7–10 daraja sovuqqacha, kunduz kunlari esa 0–3 daraja sovuqqacha tushishi kutilmoqda. Qolgan hududlarda 11–12 mart kunlari kechasi 0–3 daraja sovuq, kunduz kunlari esa 2–5 daraja iliq atrofida bo‘lishi prognoz qilingan. Toshkent uchun ham 9–12 mart oralig‘ida yomg‘irli va keskin salqinlashgan ob-havo kutilmoqda.
Qisqasi, bahor biroz tanaffus qiladi: soyabon, qalinroq kiyim va ehtiyot choralar yana kerak bo‘ladi. Ayniqsa, tog‘li va tog‘ oldi hududlarda yashovchilar yoki yo‘lga chiqmoqchi bo‘lganlar ob-havo ogohlantirishlarini diqqat bilan kuzatib borgani ma’qul.
“Zamin”ni Telegramʻda oʻqing!
