Bahor fasli kirib kelganiga qaramay, O'zbekistonga qish yana qaytmoqda. Sinoptiklar 9 mart kunidan boshlab respublika hududiga sovuq va nam havo massalari kirib kelishini ma'lum qildi. Ushbu o'zgarishlar natijasida mamlakat bo'ylab yog'ingarchiliklar kuzatiladi.
9 martdan 11 martga qadar respublikaning ko'plab hududlarida yomg'ir yog'ishi, ba'zi joylarda esa qorga aylanishi kutilmoqda. Tog'li va tog'oldi hududlarda yog'ingarchiliklar kuchli bo'lishi mumkin. Shuningdek, shamol tezligi sekundiga 15 dan 20 metrgacha, ayrim joylarda esa 25 metrgacha kuchayishi prognoz qilinmoqda.
Haroratning keskin pasayishi 10 martdan 12 mart kunlariga to'g'ri keladi. Shimoliy hududlarda kechasi 7 dan 10 darajagacha sovuq, kunduzi esa 0 dan 3 darajagacha sovuq bo'lishi kutilmoqda. Qolgan hududlarda esa kechasi 0 dan 3 darajagacha sovuq, kunduzi esa 2 dan 5 darajagacha iliq harorat kuzatiladi.
Mutaxassislar aholini ob havo o'zgarishlariga tayyor turishga chaqirmoqda. Fuqarolardan issiq kiyimlarni hozirlab qo'yish, zarur zaxiralarni tekshirish hamda tog'li hududlarga borishni vaqtincha cheklash tavsiya etiladi. Ob havo sharoitlari tufayli yo'llarda ehtiyotkor bo'lish so'raladi.
“Zamin”ni Telegramʻda oʻqing!
