“Uzgidromet” ma’lumotiga ko‘ra, 12 mart kuni O‘zbekistonda asosan yog‘ingarchiliksiz ob-havo kuzatiladi, kunduzgi harorat esa asta-sekin ko‘tarila boshlaydi. Shu bilan birga, tun va ertalabki soatlarda sovuq hali sezilib turadi, ayrim joylarda tuman ham tushishi mumkin.
Toshkent shahrida havo o‘zgaruvchan bo‘ladi, yog‘ingarchilik kutilmaydi. Kechasi 3–5 daraja sovuq, kunduzi esa 6–8 daraja iliq bo‘ladi. Poytaxtda ayniqsa ertalab tuman tushishi ehtimoli bor, shu bois haydovchilarga ehtiyot bo‘lish tavsiya etiladi.
Qoraqalpog‘iston va Xorazmda ham osmon ochiqroq bo‘ladi, biroq sovuq ancha kuchli saqlanib turadi. Bu hududlarda kechasi 3–8 daraja sovuq, kunduzi 3–8 daraja iliq kutilmoqda. Ustyurtda esa havo yanada qattiqroq bo‘lib, kechasi 10–12 daraja sovuq, kunduzi 4 daraja sovuqdan 1 daraja iliqqacha bo‘ladi.
Buxoro va Navoiy viloyatlarida yog‘ingarchilik kutilmaydi, lekin ba’zi joylarda tuman kuzatilishi mumkin. Harorat kechasi 3–8 daraja sovuq, kunduzi 4–9 daraja iliq bo‘ladi. Navoiy viloyatining cho‘l hududlarida esa tunlari 5–10 daraja sovuq saqlanadi.
Toshkent viloyati, Sirdaryo, Jizzax va Samarqandda ham kun quruq o‘tadi. Bu hududlarda kechasi 0–5 daraja sovuq, kunduzi 3–8 daraja iliq bo‘lishi kutilmoqda. Qashqadaryo va Surxondaryoda esa bahor nafasi kuchliroq seziladi: kunduzi 8–13 daraja iliq bo‘ladi. Andijon, Namangan va Farg‘onada ham yog‘ingarchilik kutilmaydi, ammo tumanli tong kuzatilishi mumkin.
Tog‘oldi va tog‘li hududlarda vaziyatga jiddiyroq qarash kerak. U yerda yog‘ingarchilik kutilmayapti, ammo tuman, sel-suv toshqini xavfi va qor ko‘chishi ehtimoli saqlanib qoladi. Harorat kechasi 10–15 daraja sovuqqacha tushishi mumkin.
12 mart kuni O‘zbekistonda ob-havo biroz yumshaydi, lekin ertalabki sovuq hali chekinmaydi. Bahor eshik qoqyapti, lekin qish ham hali “men ketmadim” deb turibdi.
“Zamin”ni Telegramʻda oʻqing!
