O‘zbekistonда 2026 yil mart oyida yengil avtomobillar bozorida faollik keskin oshdi. Bir oy ichida sotuvlar 78 mingtadan oshib, o‘tgan oyga nisbatan 19 foizga, o‘tgan yilning shu davriga nisbatan esa 20,6 foizga o‘sdi. Bu haqda Iqtisodiy tadqiqotlar va islohotlar markazi tahlillarida ma’lum qilindi.
Ma’lumotlarga ko‘ra, deyarli barcha hududlarda avtomobil bozori jonlangan. Faqat Jizzax, Andijon va Samarqand viloyatlarida biroz pasayish kuzatilgan. Eng yuqori o‘sish Surxondaryo viloyatida qayd etilib, savdo hajmi 51,4 foizga oshgan. Shuningdek, Toshkent viloyatida 46 foizlik o‘sish qayd etilgan bo‘lsa, Sirdaryo va Navoiyda mos ravishda 34,5 va 27,5 foizlik o‘sish kuzatilgan. Poytaxt Toshkent shahrida esa bozor faolligi bir oyda 60,5 foizga ko‘tarilgan.
Birlamchi bozorda yangi yengil avtomobillar savdosi qariyb 31 ming donani tashkil etib, oylik hisobda 13 foizdan ortiq o‘sishni ko‘rsatdi. Yillik dinamikada esa o‘sish 37 foizga yetgan. Mahalliy ishlab chiqarilgan avtomobillar segmentida sotuvlar 25 mingtaga yaqinlashib, oylik 3,8 foizga, yillik esa 26,5 foizga ko‘paygan.
Xorijda ishlab chiqarilgan yangi avtomobillar segmentida esa o‘sish yanada tez bo‘ldi. Bir oyda sotuvlar qariyb ikki baravarga oshib, 5,7 mingtaga yetgan. Yillik ko‘rsatkichlar ham ikki baravardan ziyod o‘sishni ko‘rsatmoqda.
Ikkilamchi bozorda ham sezilarli jonlanish kuzatildi. Mart oyida ishlatilgan yengil avtomobillar savdosi 47,5 ming donani tashkil etib, oylik hisobda 23 foizga oshgan. Yillik o‘sish esa 12 foiz atrofida bo‘ldi.
Elektromobillar bozori ham izchil rivojlanmoqda. Mart oyida ularning savdosi 5,5 mingtaga yetib, o‘tgan yilga nisbatan 24 foizga ko‘paydi. 8 ta hududda o‘sish qayd etilgan bo‘lsa, 4 ta viloyatda pasayish kuzatilgan. Eng katta o‘sish Xorazm viloyatida (5 baravar) qayd etilgan. Shuningdek, Navoiy (3,6 baravar), Jizzax (2,9 baravar) va Farg‘ona (2,2 baravar) viloyatlarida ham yuqori o‘sish sur’atlari kuzatilgan.
“Zamin”ni Telegramʻda oʻqing!
