Oʻzbekistonda koʻp kvartirali uylar atrofida avtomobillarni notoʻgʻri joylashtirishga qarshi qatʼiy cheklovlar joriy etildi. Yangi qoidalarga koʻra, endi mashinalarni trotuarlar, podʼezdlar oldi va boshqa umumiy foydalanish hududlariga qoʻyish man etiladi.
Mazkur talablar Adliya vazirligi tomonidan 29 aprel kuni davlat roʻyxatidan oʻtkazilgan “Koʻp kvartirali uylarni saqlash va ulardan foydalanish qoidalari”da belgilab qoʻyildi.
Qoidalarga binoan, avtotransport vositalarini uylarga tutash hududlardagi maysazorlar, xiyobonlar, bolalar maydonchalari, shuningdek trotuarlar va kirish yoʻlaklari qarshisiga qoʻyish taqiqlanadi. Bu cheklovlar hovlilarda harakat xavfsizligini taʼminlash va umumiy joylarni asrash maqsadida kiritilgan.
Shu bilan birga, yangi tartibda bir qator boshqa taqiqlar ham nazarda tutilgan. Jumladan, balkon va lodjiyalarga yongʻin xavfini keltirib chiqaruvchi uskunalar oʻrnatish, ularda ogʻir buyumlarni saqlash mumkin emas. Shuningdek, balkonlarning tashqi qismiga kiyim-kechak, gilam yoki boshqa buyumlarni ilib qoʻyish ham taqiqlanadi (ichki qismi bundan mustasno).
Uy hayvonlarini zinapoyalar, yertoʻlalar, chordoqlar va boshqa umumiy joylarda saqlashga ham ruxsat berilmaydi. Bundan tashqari, zina maydonchalarida yoki zinapoya ostida yonuvchan materiallarni qoldirish, shuningdek issiqlik tizimlariga oʻzboshimchalik bilan oʻzgartish kiritish man etiladi.
Yangi qoidalarda sanitariya va texnik xizmat koʻrsatish masalalariga ham alohida eʼtibor qaratilgan. Xususan, lift xonalari har hafta tozalanadi va lift uskunalari muntazam texnik nazoratdan oʻtkaziladi.
Shuningdek, agar yertoʻlada quvur avariyasi yuz berib, suv yoki oqova toʻplansa, boshqaruv organi 24 soat ichida ushbu muammoni bartaraf etishi shart qilib belgilandi.
Mutaxassislar fikricha, mazkur yangiliklar koʻp kvartirali uylarda tartib-intizomni kuchaytirish, tozalikni saqlash va aholi uchun xavfsiz muhit yaratishga xizmat qiladi.
