Oʻzbekistonda aholi salomatligini himoya qilish va oziq-ovqat xavfsizligini taʼminlash yoʻlida yana bir muhim qadam tashlanmoqda. Qonunchilik palatasi tomonidan chorvachilik mahsulotlari sifatini tubdan yaxshilashga qaratilgan qonun loyihasi birinchi oʻqishda maʼqullandi. Ushbu hujjat orqali nazorat tizimi yanada qatʼiylashtirilib, veterinariya talablari xalqaro standartlar, xususan Jahon savdo tashkiloti mezonlariga yaqinlashtiriladi.
Yangi qonun loyihasida bir qator dolzarb oʻzgarishlar nazarda tutilgan. Eng avvalo, goʻsht va sut mahsulotlarida antibiotik va boshqa dori vositalari qoldiqlarini doimiy ravishda tekshirib borishning yagona davlat tizimi joriy etiladi. Bu orqali isteʼmolchilar salomatligiga xavf tugʻdirishi mumkin boʻlgan omillar oldindan aniqlanib, bartaraf etiladi.
Shuningdek, “xavfsizlik zonalari” tizimi ishlab chiqiladi. Yaʼni mamlakat hududlari epizootik holatiga qarab alohida toifalarga ajratiladi. Bu veterinariya xizmatlariga infeksiya tarqalishining oldini tezkor ravishda olish, kasallik oʻchoqlarini cheklash va mahsulotlar tozaligini taʼminlash imkonini beradi.
Mutaxassislar taʼkidlashicha, ushbu islohotlar nafaqat ichki bozor uchun, balki tashqi savdo uchun ham katta ahamiyatga ega. Chunki mahalliy mahsulotlarning xalqaro standartlarga moslashishi oʻzbek brendining eksport imkoniyatlarini kengaytiradi, yangi bozorlarga chiqishdagi toʻsiqlarni kamaytiradi.
Umuman olganda, mazkur tashabbus aholini sifatli va xavfsiz oziq-ovqat bilan taʼminlash, shu bilan birga milliy agrosektorning raqobatbardoshligini oshirishga xizmat qiladi.
Endi eng muhim savol — ushbu nazorat tizimi amalda qay darajada ishlaydi? Agar qonun toʻliq va qatʼiy ijro etilsa, bozorda sifatsiz mahsulotlar uchun joy qolmaydi. Bu esa isteʼmolchi uchun katta yutuq boʻladi.
“Zamin”ni Telegramʻda oʻqing!
