Oʻzbekistonda may oyining ilk kunlari bahoriy, biroq beqaror ob-havo bilan boshlanadi. Bu haqda Oʻzgidromet sinoptiklari maʼlum qildi.
Prognozlarga koʻra, respublika hududining katta qismida yogʻingarchilik kuzatilib, ayrim joylarda momaqaldiroqlar boʻlishi mumkin. Faqat Qoraqalpogʻiston Respublikasi, Xorazm viloyati va Navoiy viloyatining shimoliy qismlarida yomgʻir kutilmayapti.
Sinoptiklar taʼkidlashicha, 2–3 may kunlari yogʻingarchilik kamayadi va asosan ayrim hududlardagina qisqa muddatli yomgʻirlar kuzatilishi mumkin.
Harorat koʻrsatkichlari ham biroz pasayadi. Jumladan, 1 may kuni kunduzi havo 27–30 daraja atrofida boʻlsa, dam olish kunlari 22–25 darajaga tushishi kutilmoqda. Shimoli-gʻarbiy hududlarda juma kuni 20–23 daraja boʻlishi, yakshanbaga kelib esa yana 27–30 darajagacha koʻtarilishi prognoz qilingan.
Togʻ oldi va togʻli hududlarda esa 1–3 may kunlari vaqti-vaqti bilan yomgʻir yogʻishi, ayrim joylarda kuchli momaqaldiroqlar kuzatilishi mumkin. Shuningdek, sel-suv toshqinlari xavfi ham istisno etilmayapti.
Toshkent shahrida juma kuni kunning ikkinchi yarmida qisqa muddatli yomgʻir yogʻishi va momaqaldiroq boʻlishi mumkin. Harorat 28–30 daraja boʻladi. Shanba va yakshanba kunlari ham vaqt-vaqti bilan yomgʻir yogʻib turishi ehtimoli bor. Bu kunlarda kechasi 13–15 daraja, kunduzi esa 22–24 daraja atrofida boʻlishi kutilmoqda.
Mutaxassislar aholini ob-havodagi oʻzgarishlarga tayyor turishga va ehtiyotkorlik choralarini koʻrishga chaqirmoqda.
