Shahrisabz shahrida «24 soat» chiroq o‘chmoqda. Aholi bu holatdan tashvishga tushdi

So‘nggi kunlarda «Nasafnews» axborot portaliga Shahrisabz tumani emas, balki Shahrisabz shahrining markazidan murojaatlar kelib tushmoqda. Murojaatlarning mazmuni bir xil, gaz yo‘qligi, elektr tokidagi uzoq uzilish va ichimlik suvi bilan bog‘liq muammolar.

Shahar markazida joylashgan «Marifat» mahallasida istiqomat qiluvchi fuqarolar 24 soat davomida elektr toki yonmaganidan shikoyat qilmoqda. Ular mazkur masala bo‘yicha Shahrisabz shahar elektr ta’minoti korxonasiga murojaat etishganligi, lekin muammo hal bo‘lmaganidan tashvishga tushmoqda.

Murojaatlarning mazmuniga ko‘ra, elektr ta’minoti bilan bog‘liq uzilishlar ba’zan 24 soat davom etmoqda. Isitish pechlaridan foydalanayotgan fuqarolar esa bu uzilishlar tufayli sovuq kunlarda aziyat chekyapti.

«Nasafnews» masalaga aniqlik kiritish maqsadida Shahrisabz shahar elektr ta’minoti korxonasi xodimi Anvar To‘rayev bilan bog‘landi.
- 24 soat elektr tokida uzilish bo‘lishi mumkin emas, agarda shunday holat kuzatilgan bo‘lsa biz imkon qadar muammoni bartaraf etganmiz.
24 noyabr’ kuni esa 6 yoki 7 soat «Marifat» mahallasida elektr toki yonmadi. Bunga sabab ta’mirlash ishlari olib borilganidir.
Ko‘p qavatli xonadonlarda gaz yo‘q. Ular sovuq kunda isitish moslamalaridan foydalanishadi. Shu sababli elektr toki xiralashib qoladi, - deydi Anvar To‘rayev.

Viloyatimizda hali kuz fasli tugamasdan qishning sovuq kunlari hukmronlik qilmoqda. Hamma bunday sovuq kunlarda issiqlik tizimidan foydalanishga harakat qiladi. Yuqorida ta’kidlaganimizdek, xonadonlarida gaz bo‘lmagan fuqarolar elektr toki orqali isitish moslamalaridan foydalanadi. Lekin soatlab elektr energiyasida uzilishlar kuzatilishini qanday tushunish mumkin?

Nahotki mas’ullar bu muammoni yechishning biror bir chorasini topa olmasa?

“Zamin” yangiliklarini “Telegram”da kuzatib boring