«Qizilqum» atrofidagi shubhalar: «Surxon»ning «qutqarilishi», kulguli gollar va Lazarevichning iqrori

^{Foto: Qizilqum}
Superliga 23-turiga qadar Osiyo chempionlar ligasi yoʻllanmasi uchun kurash olib borgan «Qizilqum»ning Hamidjon Aktamov bosh menejerligidagi «Surxon»ga magʻlubiyatga uchrashi har qancha shubha uygʻotib, munozara, e'tiroz, kinoyalarga sabab boʻlmasin, Navoiy klubi «Paxtakor»ga qarshi bahsda ham oʻtkazib yuborilgan navbatdagi kulguli gollar bilan e'tibor markazida boʻldi.

«Bugun «Neftchi» va «Metallurg» haqiqiy erkakcha futbol oʻynadi, uchinchi klub esa gʻururi boʻlsa 5-6 futbolchisini Toshkentda qoldirib kelaverishi kerak, soʻnggi turda yoshlar oʻynagani yaxshiroq», - deya yozdi PFL bosh direktori Diyor Imomxoʻjaev «Qizilqum»ning chempionlik uchun kurash olib borayotgan «Paxtakor»dan uchralgan 0:6 hisobidagi magʻlubiyatidan soʻng.

PFL bosh direktorining «Qizilqum» safidagi bir qator tajribali oʻyinchilarni nazarda tutib, «uchinchi klub gʻururi boʻlsa 5-6 futbolchisini Toshkentda qoldirib kelaverishi kerak», deya aytgan fikri faqat Toshkentdagi xatolari uchun emas, ikki tur avval Olmaliqda «Surxon»ga qarshi bahsdagi shubhali magʻlubiyati uchun ham atalgan boʻlsa, ajabmas.

Soʻnggi ikki safar oʻyinida Olmaliq va Toshkentdagi magʻlubiyatlardan soʻng «Qizilqum» bosh murabbiyi Nikola Lazarevich ham jamoasi oldida ojiz qolganini uning matbuot anjumanida yangragan ushbu soʻzlari tasdiqlaydi:

«Futbolchilarning oʻz vazifalari bor, yigitlar tajribali. Ammo bir narsani aytish kerakki, bu jamoani men yigʻmaganman. Agar jamoani oʻzim yigʻganimda boshqa gap edi».

Bu bilan Lazarevichning «Surxon» va «Paxtakor» oʻyinidan keyin qoʻl ostidagi futbolchilarga ishonchi qolmaganini sezish qiyin emas. «Qizilqum» ijrosidagi soʻnggi ikki safardagi oʻyinda aksariyat futbolchilarning shubhali harakati muxlis va mutaxasssislarda boʻlgani kabi jamoa ichida boʻlgan xorijlik bosh murabbiyning oʻzida ham shubha uygʻotgani tabiiy.

Lazarevichning fikrlariga qoʻshilmay iloj yoʻq – «Qizilqum» tarkibini yil boshida u emas, hozirda «Surxon» bosh menejeri sifatida ishlayotgan Hamidjon Aktamov shakllantirgan. Uzoq yillar «Qizilqum»ni boshqargan mutaxassis taklif etgan ayrim oʻyinchilar aynan uning amaldagi jamoasiga qarshi bahsda kulguli xatolarga yoʻl qoʻygani turli savollarni tugʻdirishi tabiiy.

Xususan, «Surxon» - «Qizilqum» (2:0) uchrashuvidagi penaltidan keyingi 2-goldagi himoya chizigʻining bolalarcha xatosi futbol ichidagi har qanday kishida shubha uygʻotgani aniq.

Yuqoridagi vaziyatda navoiyliklarning uzoq yillik tajribali himoyachilari Sherali Joʻraev va Fayzulla Qambarovning harakatlariga izoh bera olishar, ammo mavsum boshida Hamidjon Aktamov tomonidan taklif etilgan 88-raqamli chap qanot himoyachisi Artyom Dmitriev va 75-raqamli himoyachi Oleg Tolmasovning harakatlarini qanday tushunish mumkin? Rossiyalik oʻyinchilarning Navoiyga taklif etgani uchun Aktamovga rahmatimi bu? «Surxon» aynan ushbu gʻalaba bilan yakunda Superligada qolish vazifasini bajardi.

^{Foto: Qizilqum}
- «Surxon» kelajakda oʻsishi va toʻgʻri yoʻldan borishi uchun klub loyihasi haqida jiddiy bosh qotirish shart. Futboldan nimadir oladigan va uni loyqalashtiradigan insonlar emas, unga nimadir bera oladigan kishilar juda muhim. Maqsadga shunday kishilar bilan erishish rejada bor boʻlsa, qingʻir ishning qiyigʻi 40 yilda ham chiqadi, - deya yozadi Diyor Imomxoʻjaev Termiz klubi ligada qolish vazifasini bajargach.

Umuman olganda, mavsum yakunida «Qizilqum» bilan shartnomasi yakuniga etadigan Oleg Tolmasovning soʻnggi turda ham «Paxtakor»ga qarshi muhim oʻyinning dastlabki uchta golida Dragan Cheranga shunchaki «sovgʻa» ulashgani rossiyalik himoyachiga nisbatan turli shubhalarni asoslantiradi. Koʻring va zavqlaning:




«Qizilqum» bosh murabbiyi Tolmasovning 3-goldagi vaziyatda maydonga qulaganidan keyin 57-daqiqada uni maydondan olishga qaror qildi. Ammo bu kulguli gollar kamayishiga sabab boʻlgani yoʻq.

^{Foto: Qizilqum}
Toshkentdagi sharmandali magʻlubiyatdan keyin Nikola Lazarevich «Surxon» bilan oʻyindan keyin allaqachon iste'foga chiqishga qaror qilgani, mavsum yakunigacha chidab turganiga sha'ma qildi.

- «Surxon» bilan oʻyindan soʻng iste'fo berishimni ta'kidladim. Ketishni istadim. Ammo mavsum oxirigacha qoldim. «Soʻgʻdiyona» bilan oʻyin men uchun «Qizilqum»dagi oxirgisi boʻladi. Soʻnggi oʻyinda hammasi yigitlarning oʻziga bogʻliq. Ular oʻz vazifalarini bajarishni istasa, oxirgi turga har tomonlama tayyorlana olishadi. «Navbahor», «Metallurg»ga qarshi oʻyinlardan soʻng ketishni istagandim. «Surxon» bilan uchrashuvdan keyin esa qarorim yuz foiz aniq edi. Faoliyatimda yangi chaqiruv va restart zarur, - deya fikr bildirgan Lazarevich.

^{Foto: Qizilqum}
Moliyaviy jihatdan yuqori oʻrinlar uchun da'vogarlik qilishga kuchi etadigan «Qizilqum» oxirgi magʻlubiyatlaridan keyin OChL yoʻllanmasi uchun kurashdan chiqdi, jamoa soʻnggi turda ham oʻziga kela olmasa turnir jadvalida 7-pogʻonaga tushib ketishi ham hech gap emas. Mavsum yakunida klubda oʻzgarishlar qilinishiga shubha yoʻq, chunki baquvvat homiyga ega Navoiy klubi yuqori oʻrinlarga munosib. Ammo joriy mavsum yakunidagi xunuk holatlar shunchaki javobsiz qolishi bu jamoa ishqibozlari va Superligani kuzatib borgan oddiy muxlislarga nisbatan adolatdan boʻlmaydi.

“Zamin” yangiliklarini “Telegram”da kuzatib boring