2020 yilning kuzida katta umidlar bilan kuchli beshlik chempionatlaridan biri – Italiyaning A Seriyasiga yo‘l olgan Eldor Shomurodov ligada o‘zini ko‘rsata olmayotganiga ancha bo‘ldi. Biz uchun qanchalar yoqimsiz bo‘lmasin, legionerimiz joriy mavsumda Italiya chempionatining eng yomon hujumchilaridan biri bo‘lib turibdi.
Aslida Eldor uchun hammasi omadli boshlangandi. “Rostov”dan “Jenoa”ga ko‘chib o‘tgan futbolchimiz dastlabki mavsumning o‘zida sakkizta gol bilan muxlisu mutaxassislar e’tiborini qozondi.
Avvalgi mavqeini tiklashga qaror qilgan “Roma” tarkibda katta o‘zgarishlar qilishi ortidan A Seriyada paydo bo‘lgan umidli hujumchi Eldor Shomurodovni 18 million yevro evaziga o‘z safiga qo‘shib oldi. Bu o‘zgarishlar ortida jamoani top-klublar qatoriga qo‘shishga va’da bergan Joze Mourino turgan edi.
Esingizda bo‘lsa, Rim klubiga ko‘chib o‘tgan hamyurtimizning dastlab ishlari ko‘ngildagidek kechdi. Eldor markaziy hujumchi sifatida o‘ynab, dastlabki uchta uchrashuvda ketma-ket gol urdi.
“Roma” muxlislari Eldorni maqtay boshlashdi:
“Shomurodov mohir o‘yinchi”;
“Eldor chiroyli va samarali o‘ynaydi”;
“Shomurodovning gollari soni oshishiga ishonamiz”;
Afsuski, muvaffaqiyatli onlar uzoq davom etmadi. “Roma” rahbariyati bosh murabbiy talabiga ko‘ra, “Chelsi”ga sig‘may qolgan Temmi Abraxamni olib keldi. Avvaliga, rimliklar hujum chizig‘ida Eldor Shomurodov va Temmi Abraxam tandemi harakati qilishi aytildi.
Biroq, Joze Mourino kutilmaganda boshqacha qarorga keldi. Rejalashtirilganidek ikki markaziy hujumchiga tayanish o‘rniga, sxemani umuman o‘zgartirib yubordi. Portugaliyalik mutaxassis oldingi chiziqda birgina markaziy hujumchi bilan o‘ynaydigan bo‘ldi. Bu pozitsiyaga Shomurodovdan ikki baravar qimmatga olingan angliyalik yulduzni qo‘ydi. Bosh murabbiy Eldorni chap qanotga yubordi. Aynan mana shu qaror Shomurodovning o‘sishiga bolta urdi.
Asosiy pozitsiyasi markaziy hujumchi bo‘lgan Shomurodov har ikki qanotda tezkor va texnikasi kuchli bo‘lgan Stefan El-Shaaravi va Nikolo Dzanologa raqobatni boy bera boshladi. Bora-bora zaxira o‘yinchisiga aylanib qoldi. O‘yin vaqti sezilarli darajada kamaydi.
“Yuventus”ga qarshi o‘tkazilgan uchrashuvdan keyin Mourino Eldorni mag‘lubiyatda asosiy aybdorga chiqardi. Shunday keskin tanqididan so‘ng futbolchimizning agentlari uni boshqa jamoaga o‘tkazmoqchi bo‘ldi. Eldorni so‘ragan jamoalar ko‘p bo‘ldi. Italiyadan tashqari, Angliya, Germaniya, Fransiya, Turkiya, Saudiya Arabistoni klublari aloqaga chiqdi.
Ishni yana Mourino to‘xtatdi. O‘tgan yozda Eldorni so‘ragan jamoalarga ketishiga yo‘l qo‘ymadi.
Mourinoning faqat o‘ziga tushunarli bo‘lgan qarorlari Italiya futbolida o‘z o‘rnini topishga intilib kelayotgan Shomurodovning faoliyatini izdan chiqarib yubordi.
Nihoyat, 2023 yilning yanvariga kelib, Shomurodov Mourinoning qaramog‘idan chiqishga erishdi. Joze o‘zi imkon bermagan o‘yinchimizni maqtab-maqtab, "Spetsiya"ga qo‘yib yubordi.
- Eldor ajoyib yigit. Doimiy o‘yin amaliyotiga ega bo‘lishi kerak. Shuning uchun ham uni olti oyga ijaraga beramiz. Ortga qaytishini kutamiz, - dedi Joze Mourino.
Shomurodovning yangi jamoasi – “Spetsiya” ilgari Italiya chempioni bo‘lgan, lekin hozir yuqori divizion autsayderlaridan.
Bir yarim million evaziga ijaraga o‘tgan o‘zbek hujumchisi olidida ikkita vazifa turibdi – avvalo, o‘z karerasini jonlantirish va bu orqali “Spetsiya”ning A Seriyada qolishiga yordamlashish.
Hozircha, Eldor yangi jamoasi safida oltita uchrashuvda maydonga tushib, jami 344 daqiqa to‘p tepdi. Achinarlisi, u hali ham birorta samarali harakatni amalga oshira olgani yo‘q.
Yangi bosh murabbiy Leonardo Semplichi “Inter”ga qarshi bahsda Eldorni ilk daqiqalardan o‘ynatdi. Hujumchi 45 daqiqa davomida raqib darvozasiga birorta zarba bera olgani yo‘q. Hujumdagi sherigi Mbala Nzola uni ikki marta qulay pozitsiyaga chiqaradigan pas uzatdi. Eldor ularga yetolmadi. Qolaversa, Shomurodov uzatgan to‘plarning 43 foizi manzilga yetib bormadi.
Legionerimiz hali A Seriyada birorta samarali harakatni amalga oshira olgani yo‘q. Bu ketishda Shomurodov “Roma”ga qaytgan taqdirda ham asosiy tarkibga kira olmaydi. Hamyurtimiz qolgan vaqt davomida A Seriyada qodirligini yana bir karra isbotlab qo‘yishi talab qilinmoqda.
“Zamin” yangiliklarini “Vkontakti”da kuzatib boring
