Vlado Radmanovich: Bizda hujumkor futbolchilar ko‘p emas

Jahon chempionati saralashidan o‘rin olgan O‘zbekiston - Eron bahsi bo‘lib o‘tdi.

Uchrashuv davomida bir nechta yaxshi imkoniyatlar bo‘lishiga qaramay, darvozalar ishg‘ol qilinmadi va tomonlar bir ochkodan bo‘lishib olishdi. Mehmonlar esa bir kishi kam bo‘lib qolishgandi.

Ushbu bellashuvdan so‘ng har ikki jamoa murabbiylari o‘rtasida matbuot anjumani bo‘lib o‘tdi. Quyida termamiz ustozi Vlado Radmanovichning fikrlari bilan tanishib chiqishingiz mumkin:

- Barchaga xayrli kech. Biz bu bellashuv juda qiyin o‘tishini bilardik. Sababi, Eron Osiyoning eng kuchli terma jamoalaridan biri. Uchrashuv o‘ta ochiq bo‘lmadi. Shunday bo‘lsa-da, qiziqarli bellashuv guvohi bo‘ldik.

- Biz o‘yindan o‘yinga kuchayib boraveramiz. Sababi, yana 7 ta bellashuv bor va ularning har biri juda muhim hisoblanadi. Muxlislar xuddi bugun bo‘lgani kabi keyingi uchrashuvda ham bizni qo‘llab-quvvatlaydi degan umiddaman.

- Murabbiylar uchun hakamlar haqida gapirish xato deb hisoblayman. Murabbiylar o‘z ishini va hakamlar o‘z ishini qilgani ma’qul.

- Mazkur bahs davomida janob Katanes bilan doimiy aloqada bo‘ldik. Biroq Srechko shu yerda bo‘lganida hammasi yaxshiroq bo‘lar edi.

- Terma jamoada futbolchilar bilan ishlash uchun, ularni yetarlicha tayyorlash uchun vaqt kam. Termada biz ularni faqat taktik tomondan tayyorlashimiz mumkin.

- To‘g‘risi, taktika haqida bu yerda gapirishni xohlamayman. Bilasiz, bizda bir muammo bo‘ldi. Bu Oston O‘runovning jarohati. Aytish kerak, bizda bu kabi futbolchilar ko‘p emas. O‘yinni kuchaytirishga harakat qilgan bo‘lsak ham bu foyda bermadi. “Zamin” yangiliklarini “Facebook”da kuzatib boring