VAR Husanovni qutqargan uchrashuvda Abduqodirning o‘yini qanday baholandi?

Fransiya chempionatining 15-turida “Lans” safar uchrashuvida “Oser”dan bir ochko olib qaytdi. Bellashuvda lansliklar ikki bor hisobda oldinga chiqib olganiga qaramay, o‘yinda durang qayd etildi – 2:2.

Keskin va murosasiz o‘tgan bahsning kulminatsion nuqtasi 63-daqiqaga to‘g‘ri keldi. “Lans” jarima maydonchasi ichida Pol Joli Abduqodir Husanov bilan to‘qnashdi va hakam penalti belgiladi. Lekin ishga VAR aralashdi va videotakror Husanov to‘qnashuv chog‘ida oyog‘ini raqibdan olib qochgani va o‘yin qoidasini buzmagani ma’lum bo‘ldi.

Shu tariqa, Husanov penaltiga sababchi bo‘lishdan qutilib qoldi.

Fransiya futbolini yoritib kelayotgan madeinlens.com portali ekspertlari “Lans” futbolchilarining harakatlarini quyidagicha baholadi.

Bris SAMBA (5):
Bris uchrashuv davomida bir necha bor seyv namoyish qildi. Biroq tajribali posbon ikkita to‘p o‘tkazib yubordi. Ayniqsa, jarima nuqtasidan kiritilgan golga aynan u javobgar.

Pshemislav FRANKOVSKI (7):
O‘z pozitsiyada juda faol o‘ynadi, himoyaga yordam berdi va Mbala Nzola gol urgan vaziyatda assist qayd etdi.

Abduqodir HUSANOV (7):
Har doimgidek jamoaga juda kerakli o‘yinchi ekanini namoyish qildi. Raqibning bir necha hujumlarini qaytardi. Jarima zarbasi xavfli ko‘rinish oldi. Husanov “Oser” futbolchisi Jolining simulyatsiyasini aniqlab, belgilangan penaltini bekor qilgani uchun VAR mutaxassislariga minnatdorlik bildirib qo‘yishi kerak.

Kevin DANSO (6):
Himoyani Husanovga ishongan holda oldinga o‘tib o‘ynashga harakat qildi, biroq bu kutilgan samarani bermadi.

Fakundo MЕDINA (5):
Harchand urinmasin chap qanot himoyasida o‘zida qulay his qilayotgani yo‘q va bu o‘yin sifatiga ta’sir qilyapti.

Nil EL-AYNAUI (6):
Yaxshi o‘yin ko‘rsatdi va hisobni ochishga muvaffaq bo‘ldi. O‘rnini Endi Diufga bo‘shatib berdi.

Adriyen TOMASSON (6):
Har doimgi vazifasini o‘rta darajada bajardi. Bosh murabbiy o‘yinni kuchaytirish uchun o‘rniga Xamzat Ojediranni tushirdi.

Remi LABO LASKARI (7):
O‘ng qanotda juda faol o‘ynadi va birinchi golda uning hissasi katta. Biroq bahs davomida o‘yin qoidasini ko‘p buzdi.

Anass ZARURI (4):
Chap qanotda o‘ynagan Zaruri bahsga yetarli darajada ta’sir o‘tkaza olmadi. “Lans”ning chap qanoti ancha bo‘sh harakat qildi.

Anjelo FULJINI (4):
Bu futbolchi oldingi chiziqda Nzolaga yoram bera olgani yo‘q.

Mbala NZOLA (6):
Angolalik hujumchiga uchrashuv og‘ir boshlandi, lekin Frankovski uni samarali pas bilan ta’minlab, gol urishiga yordam berib yubordi. Bo‘sh hududlarga chiqib ochilishda sustkashlikka yo‘l qo‘ydi. Shunga qaramay, raqib himoyachilariga bosim o‘tkaza oldi.

“Lans” Liga 1 doirasidagi navbatdagi uchrashuvni kelasi yil o‘tkazadi. 5 yanvarga belgilangan bahsda Abduqodir Husanov jamoasi o‘z maydonida “Tuluza”ni qabul qiladi. “Zamin” yangiliklarini “Odnoklassniki”da kuzatib boring