Inzagi: “Barselona”ni yengish uchun yurak kerak edi – yigitlarim bunga loyiq bo‘lishdi

Yevropa Chempionlar Ligasining shiddatli va dramatik yarim finalidan so‘ng “Inter” bosh murabbiyi Simone Inzagi matbuot anjumanida o‘z jamoasining g‘alabasi va “Barselona”ga qarshi ikki uchrashuv haqida atroflicha fikr bildirdi. Uning so‘zlariga ko‘ra, bu g‘alaba tasodif emas, balki haqiqiy mehnat va yurak orqali erishilgan natija bo‘ldi.

“Barsa”ni mag‘lub etish oson emas

“Avvalo raqibni — “Barselona”ni tabriklayman. Ular har jihatdan mukammal va to‘liq shakllangan jamoa. Lekin bizning futbolchilarimiz bugun jismonan ham, ruhan ham qanday darajada kurashish mumkinligini butun Yevropaga namoyish qilishdi. Men ular bilan faxrlanaman, ular menga har kuni murabbiy bo‘lish sharafini taqdim etishyapti”, — dedi Inzagi.

Dahshatli ikki o‘yin va jamoaning ruhi

“Barselona”ga qarshi ikkala o‘yin ham oson kechmadi. Bizda turli jarohatlar, tarkibiy muammolar bor edi, lekin jamoa yuragi bilan harakat qildi. Bu futbolda juda muhim jihat — taktika va texnikadan tashqari yurak bilan o‘ynash. Yigitlar aynan shuni namoyish qilishdi”.

Yamal va de Yong — jamoa taassurotlari

Jurnalistlar tomonidan so‘ralgan “Barselona” yulduzlari haqida fikr bildirishni so‘rashganda, Inzagi bunday dedi:
“Yamal haqida ko‘p gapirildi — u haqiqatan yosh, lekin ajoyib iqtidor egasi. Biroq men yana bir futbolchidan hayratda qoldim — bu Frenki de Yong. U maydonda har bir harakati bilan jamoaning yuragi ekanini ko‘rsatdi. Biroq shunday yulduzlarga qaramasdan, men o‘zimning jamoamni hech kimga almashmasdim. Ularning jonkuyarligi, ishtiyoqi va sadoqati — bu men uchun eng katta qadriyat”.

Maqsad — final va undan ham ko‘prog‘i

Inzagi so‘zining yakunida jamoaning finalda ham maksimal natijaga intilishini ta’kidladi. Uning so‘zlariga ko‘ra, “Inter” hozir shunchaki finalda ishtirok etish uchun emas, balki unda g‘olib chiqish niyatida.

“Biz hali hech narsa yutmaganmiz. Finalga chiqqan bo‘lsak-da, oldinda yana bir o‘ta jiddiy sinov turibdi. Lekin bu jamoa, bu xarakter bilan biz faqat finalda ishtirok etishni emas, unda zafar quchishni ham orzu qilyapmiz. Va men ishonaman — bu yigitlar bunga loyiq”.

Bu fikrlardan so‘ng “Inter”ning finaldagi harakatlari ham muxlislar uchun yanada qiziqarli va ruhlantiruvchi tus olishi shubhasiz. Endilikda barcha e’tibor hal qiluvchi finalga qaratiladi.

Siz nima deb o‘ylaysiz: “Inter” chempion bo‘lishga tayyormi? “Zamin”ni Telegramʻda oʻqing!