PSJ «Inter»ni yakson qildi va tarixda ilk bor chempion! (video)

Butun Yevropa va dunyo futbol ishqibozlari tomonidan intiqlik bilan kutilgan UYEFA Chempionlar ligasining final bahsi nihoyat o‘z nihoyasiga yetdi. PSJ klubi o‘z tarixida ilk bor ushbu nufuzli musobaqaning kubogini boshi uzra baland ko‘tardi. Fransiyaning Parij klubi hal qiluvchi uchrashuvda Italiyaning mashhur "Inter" jamoasini juda yirik hisob – 5:0 bilan taslim qildi.

Myunxendagi «Allianz Arena» stadionida 75 ming muxlis oldida o‘tgan uchrashuvning birinchi daqiqalaridanoq parijlik futbolchilar o‘z ustunligini ko‘rsatishdi. Uchrashuvning 12-daqiqasida marokashlik himoyachi Ashraf Hakimi o‘zining aniq va kuchli zarbasi bilan hisobni ochdi. «Inter» darvozaboni bu vaziyatda ojiz qoldi va hisob 1:0.

Bu goldan keyin ham PSJ bosimni yanada kuchaytirdi va ko‘p o‘tmay 20-daqiqada talantli yarim himoyachi Dezire Duye hisobni 2:0 ga yetkazdi. Birinchi taym shunday hisob bilan yakunlandi va "Inter" jamoasiga dam olish paytida o‘yin rejasini o‘zgartirish zarurati tug‘ildi.

Ikkinchi taym ham parijliklar nazoratida kechdi. 63-daqiqada Dezire Duye yana bir bor o‘z nomini tabloga yozdirib qo‘yib, dublga erishdi va hisobni yirik – 3:0 ga yetkazdi. "Inter" bu vaziyatdan keyin ham jamoa o‘yinida kutilgan o‘zgarishni ko‘rsata olmadi.

73-daqiqada esa maydonga zaxiradan tushgan gruziyalik yulduz Xvicha Kvarasxeliya ajoyib gol urib, hisobni 4:0 ga yetkazdi. Bu goldan keyin "Inter"ning ruhiy holati butkul tushib ketdi va jamoa qarshilik qilishda davom etolmadi.

Uchrashuvning yakuniga ikki daqiqa qolganda, 88-daqiqada Senni Mayulu tomonidan kiritilgan gol final uchrashuviga yakun yasadi – 5:0. "Inter" klubi o‘z tarixidagi eng yirik mag‘lubiyatlaridan birini qabul qilib oldi.
width="640" height="360" src="https://mover.uz/video/embed/KmaHkaXd" frameborder="0" allowfullscreen="" class="fr-draggable"> class="fr-mk" style="display: none;"> class="fr-mk" style="display: none;">
Bu g‘alaba PSJ uchun juda muhim ahamiyat kasb etadi, chunki klub o‘z tarixida ilk bor Yevropa futbolida eng obro‘li sovrin – Chempionlar Ligasini qo‘lga kiritdi. Ushbu musobaqaning 2020 yilgi finalida ham ishtirok etgan PSJ, o‘shanda Germaniyaning «Bavariya» klubiga 0:1 hisobida imkoniyatni boy bergan edi. Bu safar esa parijliklar o‘sha mag‘lubiyat uchun chiroyli tarzda «qasos» olib, katta g‘alabaga erishdilar.

PSJ bosh murabbiyi Luis Enrike bu natija bilan klub tarixiga yangi oltin sahifa qo‘shib, o‘z murabbiylik salohiyatini yana bir bor namoyon qildi. Bu musobaqa uning murabbiylik faoliyatidagi muhim muvaffaqiyat bo‘lib, u Yevropadagi eng kuchli murabbiylar qatoriga qo‘shildi.

PSJ muxlislari esa shu paytgacha intizor bo‘lgan Chempionlar Ligasi sovrinini nihoyat o‘z jamoalari qo‘lida ko‘rib, juda katta quvonch va bayram kayfiyatiga to‘ldi.

Ushbu kecha parijliklar uchun nafaqat g‘alaba kuni, balki futbol tarixidagi buyuk burilish kuniga aylandi!