Teyani Reynders: “Siti”ga De Bryuyne o‘rnini bosish uchun kelmadim

Angliyaning “Manchester Siti” jamoasiga yaqinda qo‘shilgan niderlandiyalik iqtidorli yarim himoyachi Teyani Reynders o‘zining yangi klubdagi vazifalari va maqsadlari haqida jurnalistlarga intervyu berdi. Uning aytishicha, u mashhur Kevin De Bryuynening o‘rnini bosish niyatida emas — balki “Siti” safida o‘z uslubini namoyon etishni istaydi.

“Men bu yerga biron kimning o‘rnini to‘ldirish uchun kelmadim. Mening maqsadim – o‘zimning o‘yinimni ko‘rsatish. Shubhasiz, men turli futbolchilarning harakatlarini o‘rganaman, ulardan nimanidir qabul qilaman. Masalan, Kevin De Bryuynening pozitsiyani baholashi va aniq uzatmalari menga juda yoqadi. Ammo men u emasman – men Teyani Reyndersman”, – dedi yangi transfer davomida.

Reynders joriy yilning 11 iyun kuni rasman “Milan” jamoasidan “Manchester Siti”ga o‘tgani e’lon qilingandi. Italiyadagi faoliyati davomida u o‘zini universal va aql bilan o‘ynaydigan futbolchi sifatida namoyon qilgan. Uning taktik saviyasi, pas madaniyati va pozitsion harakatlari Xosep Gvardiolaning o‘yin uslubiga mos keladi.

Ayni paytda “Manchester Siti”da yangi mavsum uchun kuchli tarkib shakllantirilmoqda. Kevin De Bryuynening “Napoli”ga ketishi bilan jamoa markazida bo‘shliq yuzaga kelgandi. Biroq Gvardiola va jamoa rahbariyati ushbu yo‘qotishni Reynders bilan kompensatsiya qilishga umid qilmoqda.

APL 2024/25 yilgi mavsumida “Siti” uchinchi o‘rinni egalladi. Bu natija klub tarixida past deb hisoblanmasada, murabbiylar shtabi chempionlikni qaytarish uchun yangi qo‘shimchalarga ishonmoqda. Reyndersning transferi esa shu yo‘ldagi muhim qadamlardan biri sifatida baholanmoqda.

Muxlislar esa niderlandiyalik futbolchining yangi jamoada qanday faoliyat olib borishini katta qiziqish bilan kuzatmoqda. Uning texnik imkoniyatlari, universal pozitsiyalarda o‘ynashi va maydondagi aqlli qarorlari “Siti”ga yangi rang berishini intiqlik bilan kutishmoqda.

Teyani Reyndersning “Manchester Siti”dagi tarixi endigina boshlanmoqda. U o‘z nomini shu klubda yozishga tayyor ekani shubhasiz. “Zamin”ni Telegramʻda oʻqing!