"Mak Allisterga qarshi 6 millionlik da’vo: Sevgi, xafalik va sud!"

Argentina OAVi tarqatgan xabarlarga ko‘ra, “Liverpul” klubi futbolchisi Aleksis Mak Allister o‘zining sobiq sevgilisi — Kamila Mayyan bilan murakkab huquqiy mojaroga duch keldi. Bu mojaro sobiq juftlik o‘rtasidagi shaxsiy munosabatlarga oid bo‘lib, Kamilaning da’vo arizasi keng jamoatchilik e’tiborini tortdi.

Ma’lum bo‘lishicha, Mayyan besh yil davom etgan munosabatlar uchun moliyaviy tovon talab qilmoqda. Uning fikriga ko‘ra, u Angliyada Aleksis bilan birga yashagan paytda o‘z kasbiy faoliyatini to‘liq rivojlantira olmagan. Shu bois o‘tgan yillarning «iqtisodiy yetkazilgan zarari» uchun 6 million dollar kompensatsiya so‘ramoqda.

Ayni paytda Mak Allister yangi jufti — model Aylen Kova bilan munosabatda va xabarlarga ko‘ra, juftlik farzand kutmoqda. Bu holat Mayyanning o‘zini aldangan his qilishini yanada kuchaytirgan bo‘lishi mumkin.

Biroq bu huquqiy nizo Mayyan foydasiga hal bo‘lishi ehtimoli juda past. Sababi, Mak Allisterning advokatlari ish Angliyada ko‘rilishi belgilanganini ma’lum qilishgan. Bu mamlakatda esa faqat juftlikning rasmiy nikohi mavjud bo‘lgan taqdirdagina moliyaviy tovon masalalari ko‘riladi. Shuningdek, sud Argentina qonunchiligi bu holatga tatbiq etilmasligini va nizo faqat Britaniya yurisdiksiyasi doirasida hal etilishini ta’kidlagan.

Munosabatlardan moliyaviy talablar, shaxsiy hayotdagi burilishlar va yurisdiksiya mojarosi — futbolchi hayoti maydondan tashqarida ham tinch emas, ko‘rinadi. “Zamin”ni Telegramʻda oʻqing!