Superliga 17-turi doirasidagi qizg‘in va shiddatli bahslardan biri — “Navbahor” va “So‘g‘diyona” jamoalari o‘rtasida kechdi. Namanganda bo‘lib o‘tgan bellashuvda jamoalar 1:1 hisobida durang qayd etdi. Mazkur uchrashuvdan so‘ng “So‘g‘diyona” klubi bosh murabbiyi Ivan Boshkovich matbuot anjumanida ishtirok etib, o‘zining batafsil taassurotlari bilan o‘rtoqlashdi.
Tajribali mutaxassisning ta’kidlashicha, bugungi bellashuv ko‘pchilik muxlislar uchun tomoshabop va mazmunli tarzda o‘tdi. Unga ko‘ra, jamoa ayrim epizodlarda sekin harakat qilgan, ammo bu holatning aniq sababi hozircha noma’lum. Ushbu nuqsonlarni tahlil qilish va ular ustida ishlash murabbiylar shtabi uchun ustuvor vazifa bo‘lib qolmoqda.
"O‘yinning ilk daqiqalarida harakatimiz biroz tartibsiz ko‘rinish oldi, biroq keyinroq jamoa o‘z o‘yinini topdi va ancha sifatli futbol namoyish etdi", — dedi Boshkovich. Shuningdek, u ikkinchi taymda jamoasi ko‘proq to‘p nazoratiga ega bo‘lganini va raqibning kuchli tomonlariga qarshi munosib o‘yin ko‘rsatganini ta’kidladi.
Mutaxassisning fikricha, "Navbahor"ning qanotdagi tezkor va xavfli harakatlariga qarshi himoyada oldindan tayyorgarlik ko‘rilgan va bu o‘z samarasini bergan. Namanganda mehmon sifatida o‘ynash qiyin bo‘lishiga qaramasdan, jamoa oxirigacha kurashib, ruhan mustahkamlikni saqlab qolgan.
Oldingi turdagi "Nasaf"ga qarshi uchrashuvda mag‘lub bo‘lgan jamoa bu safar durang bilan cheklandi. Boshkovich bu haqda shunday dedi: "Birinchi davradagi holatimiz bilan solishtirganda, hozirda ancha o‘sish bor. Tarkibimizda iqtidorli futbolchilar yetarli va asosiy muammo vaziyatlarni golga aylantira olmayotganimizda. Bu borada albatta ishlar davom ettiriladi."
Jamoa katta darajada Lyupcho Doriyevga suyanayotgani haqidagi savolga javoban bosh murabbiy uning rolini inkor etmasligini aytdi. “Albatta, Doriyev kabi yuqori sifatga ega futbolchi har qanday jamoa uchun boylik hisoblanadi. U chempionatning eng yaxshi o‘yinchilaridan biri bo‘lishi mumkin. Ammo jamoada undan tashqari ham 10 nafar futbolchi bor va har biri o‘z vazifasiga ega”, — dedi u.
Shuningdek, yangi kelgan futbolchilar haqida so‘ralganda, Boshkovich ular hali jamoaga to‘liq moslashmaganini, biroq tez orada o‘zlarini namoyon etishlariga ishoncha bildirdi: “Talablarim doim yuqori, lekin men bu futbolchilardan kelgusi 3-4 o‘yinda kuchli o‘yin kutayapman. Mashg‘ulotlarda jiddiy ish olib borishayapti.”
Ivan Boshkovich o‘z chiqishini yakunlar ekan, oldindagi 13 turda bor imkoniyatni ishga solib, maksimal darajada ochko jamg‘arishga intilishlarini ta’kidladi. Uning so‘zlariga ko‘ra, haqiqiy natija chempionat yakunida ko‘rinadi va bu jamoaning sa’y-harakatlari bilan bog‘liq bo‘ladi.
Muxlislar esa jamoaning keyingi taqdiri va natijalarini katta qiziqish bilan kuzatishda davom etmoqda.
