La Liganing yangi mavsumi qiziqarli va kutilmagan voqealarga boy tarzda start oldi. Birinchi tur doirasida Xans-Diter Flik boshqaruvidagi “Barselona” safarda “Malorka”ga qarshi maydonga tushib, ishonchli tarzda 0:3 hisobida zafar quchdi.
Uchrashuvning ilk daqiqalaridanoq mehmonlar ustunlikni qo‘lga olishdi. Uchrashuvning 8-daqiqasida Rafinya jamoasini hisobda oldinga olib chiqdi. Bundan ko‘p vaqt o‘tmay, 23-daqiqada Ferran Torres ham o‘z nomini tabloga yozdirib qo‘ydi va farqni ikki to‘pga yetkazdi. Bu gol “Barselona” futbolchilarining ishonchi va kayfiyatini yanada ko‘tarib yubordi.
Birinchi bo‘limda maydonda kurash qizg‘in tus olgan bo‘lsa-da, ikkinchi taymda ham kataloniyaliklar o‘z hujumlarini to‘xtatmadi. Qo‘shib berilgan vaqtda esa Lamin Yamal mavsumdagi ilk golini urdi va g‘alabani mustahkamladi. Uning bu goli nafaqat o‘yin nuqtasini qo‘ydi, balki yosh vunderkindning yangi mavsumdagi katta maqsadlarini ham ishora qildi.
Shu bilan birga, bahs intizomiy jihatdan ham qiziqarli vaziyatlarga boy bo‘ldi. 33-daqiqada “Malorka” o‘yinchisi Manuel Morlanes qoidabuzarlik uchun to‘g‘ridan to‘g‘ri qizil kartochka oldi. Ordan ko‘p o‘tmay, 39-daqiqada Vedat Muriki ham maydondan chetlatildi. Shu holatdan keyin mezbonlar ikki nafar futbolchisiz qolishdi va ularning vaziyati yanada qiyinlashdi.
Xulosa qilib aytganda, “Barselona” yangi mavsumni ishonchli g‘alaba bilan boshladi. Hujumdagi samaradorlik, yoshlarning faolligi va intizomiy ustunlik Flik jamoasi uchun yaxshi ko‘rsatkich bo‘ldi. Kataloniyaliklar muxlislari esa yangi mavsumdan katta umid bilan maydonni tark qilishdi.
