Italiya milliy terma jamoasining yangi bosh murabbiyi Jennaro Gattuzo Estoniyaga qarshi JCH–2026 saralash bosqichi 5-turida debyut bahsini o‘tkazdi. Rimliklar ushbu bellashuvda 5:0 hisobida yirik g‘alaba qozondi. Biroq g‘alabaning ortidagi sababi haqida futbolchilarning o‘zi qiziqarli holatni ochiqqa chiqardi.
Himoyachi Alessandro Bastonining aytishicha, Gattuzo tanaffusda o‘yinchilarga «bir-ikkita qattiq shapaloq bergan». Bu harakat jamoaga kuchli ta’sir ko‘rsatgan va ikkinchi bo‘limda Italiyaliklar raqib darvozasiga 5 ta gol yo‘llashga erishgan.
Gollar: Ken (58), Retegi (69, 89), Raspadori (71), Bastoni (90+2).
Bu holatni hujumchi Jakomo Raspadori ham tasdiqladi. U Sky Sport Italia nashriga bergan intervyusida shunday dedi: «Bastoni majoziy ma’noda aytgan, deb o‘ylaysizmi? Yo‘q, u rostdan ham bizga tarsaki tushirdi. Men ham shulardan ulush oldim».
Shu bilan birga, Raspadori Gattuzoning bu qat’iyatli harakati futbolchilarga yangi ruhiy kuch bag‘ishlaganini ta’kidlab: «Shu kunlarda u bizga qat’iyat va matonat berdi. Biz iqtidorli futbolchilarmiz, faqat maydonda o‘zimizni ko‘rsatishimiz va buni isbotlashimiz kerak», – dedi.
Eslatib o‘tamiz, Estoniyaga qarshi uchrashuv Gattuzoning Italiya terma jamoasi bosh murabbiyi sifatidagi ilk bahsi bo‘ldi va u debyutni yirik g‘alaba bilan boshladi.
“Zamin”ni Telegramʻda oʻqing!
