Arina Sobolenko Serena Uilyamsdan keyin AQSH ochiq chempionatida yakkalik bahslarida g‘oliblikni himoya qilgan birinchi tennischi bo‘ldi, deb xabar beradi Opta Ace.
Belaruslik sportchi finalda amerikalik Amanda Anisimovani 6:3, 7:6 hisobida mag‘lub etib, 1 soat 35 daqiqa davom etgan bahsni o‘z foydasiga yakunladi.
Ushbu g‘alaba Sobolenkoning faoliyatidagi 21-WTA sovrini bo‘ldi. Shuningdek, u “Katta dubulg‘a” musobaqalarida to‘rtinchi chempionlikni qo‘lga kiritdi: ikki marta US Open va ikki marta Avstraliya Open musobaqalarida zafar quchgan. Joriy yilda esa belaruslik tennischi to‘rt unvon bilan yilni yakunlamoqda.
“Jamoamga minnatdorlik bildiraman. Men uchun bu yil oson kechmadi. Ayrim yutqazilgan finallarda sizlarga qattiq munosabatda bo‘lganimni bilaman. Shunga qaramay, yonimda bo‘lganingiz uchun rahmat. Men sizlarni oilamdek yaxshi ko‘raman. Va meni doimo qo‘llab-quvvatlaydigan yigitimga ham alohida tashakkur,” — dedi Sobolenko.
“Zamin”ni Telegramʻda oʻqing!
