Osiyo qit’asida JCH-2026 saralashlari hal bo‘ladigan pallaga kirdi. Bugun saralashning to‘rtinchi bosqichi start olmoqda — uchinchi bosqichni 3–4-o‘rinlarda yakunlagan 6 ta terma (Qatar, BAA, O‘mon, Saudiya Arabistoni, Indoneziya va Iroq) qolgan ikki yo‘llanma uchun bahs yuritadi. Qisqa formatdagi ushbu bosqich FIFAning oktyabr oyi oynasi davomida tugatiladi: jamoalar o‘zaro o‘yinlar o‘tkazadi, guruh g‘olibi esa mundialga bevosita yo‘l oladi.
Guruhlar taqsimoti
- “A” guruhi: Qatar, BAA, O‘mon
- “B” guruhi: Saudiya Arabistoni, Indoneziya, Iroq
Kun dasturi
- 20:00 — O‘mon vs Qatar
- 22:00 — Indoneziya vs Saudiya Arabistoni
Ikki guruhda ham har ochko oltinga teng: qisqa taqvim, kuchlar pariteti va katta bosim sharoitida xatoga yo‘l qo‘ymaslik eng muhim omilga aylanadi. “A” guruhida tayyorgarlik darajasi va taktik intizom hal qiluvchi bo‘lishi kutilsa, “B” guruhida esa Indoneziyaning emotsiyasiga qarshi Saudiya va Iroqning tajribasi sinovdan o‘tadi.
Final chizig‘ini birinchi bo‘lib kesgan ikki terma AQSH, Kanada va Meksika sahnalariga bevosita yo‘llanmani qo‘lga kiritadi. Qit’a futbolida hal qiluvchi haftalar boshlandi — maydonda esa faqat kuchlilar qoladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
