Nigeriyalik mashhur UFC jangchisi Kamar-u Usman braziliyalik Aleks Perreyra va rossiyalik Magomed Ankalayev o‘rtasida uchinchi jang — ya’ni trilogiya tashkil etilishiga umid bildirdi. Uning fikricha, aynan bu to‘qnashuv yordamida ikki jangchi o‘rtasidagi “kim kuchliroq?” degan savolga aniq nuqta qo‘yiladi.
“Biz avval Perreyraning kamarni qanday yo‘qotganini ko‘rdik, bu holat barchamizga ma’lum. Keyin Ankalayev ham unvondan ayrildi. Lekin shunga qaramasdan, hali ham aniq javob yo‘q — kim ustunligini bilish uchun yana bir jang kerak. Men bu trilogiyani katta turnirda, masalan, Oq uyda o‘tkazilishida ko‘rmoqchiman”, — degan Usmanning so‘zlarini “Red Corner MMA” nashri keltiradi.
Eslatib o‘tish joiz, oxirgi bellashuv “UFC 320” turniri doirasida bo‘lib o‘tdi. Unda braziliyalik Aleks Perreyra raqibi Magomed Ankalayevni birinchi raundda texnik nokaut orqali mag‘lubiyatga uchratdi. Bu natija jang dunyosida katta muhokamalarni keltirib chiqargandi.
Kamar-u Usmanning ta’kidlashicha, har ikki jangchi yuqori darajadagi mahorat egalari bo‘lib, ularning kurash uslubi UFC tarixidagi eng dramatik janglardan biriga aylanishi mumkin. Uning so‘zlariga ko‘ra, bu safar g‘alaba kimga nasib etishini oldindan aytish qiyin.
“Fanatlar bu raqobatni yaxshi ko‘radi. Bu nafaqat sport, balki iroda, strategiya va tajriba sinovidir. Har ikkisi ham bu bahsga arziydi”, — dedi Usman.
Shu tariqa, Kamar-u Usmanning fikricha, Perreyra va Ankalayevning trilogiyasi nafaqat UFC tarixiga yozilishi, balki jangchilarning haqiqiy maqomini belgilab berishi mumkin. Ehtimol, yaqin vaqtlarda bu g‘oya amalga oshar va oktagonda yana bir katta to‘qnashuvni guvoh bo‘larmiz.
“Zamin”ni Telegramʻda oʻqing!
