O‘zbekiston Professional futbol ligasi (O‘zPFL) Superligada sentyabr oyining eng yaxshi murabbiyini e’lon qildi. Bu mukofot «Nasaf» klubi bosh murabbiyi Ro‘ziqul Berdiyevga nasib etdi.
54 yoshli tajribali mutaxassis joriy mavsumda ikkinchi bor, umumiy hisobda esa 16-marta oy murabbiyi bo‘ldi. Bu ko‘rsatkich Berdiyevning milliy chempionatdagi barqaror ish uslubini va jamoasi bilan erishgan muvaffaqiyatlarini yana bir bor tasdiqladi.
O‘zPFL xabariga ko‘ra, Berdiyev bu borada o‘zining rekordini yangilashda davom etmoqda. Uning rahbarligidagi «Nasaf» sentyabr oyida Superliga doirasidagi barcha uchrashuvlarda g‘alaba qozondi.
Qarshiliklar 10 sentyabr kuni «Buxoro»ni 5:0 hisobida yirik mag‘lubiyatga uchratdi. 21-sentyabrda «Qizilqum» ustidan 1:0, 29-sentyabrda esa «Xorazm»ni 2:1 hisobida yengib, to‘liq 9 ochko jamg‘ardi. Ushbu bahslarda to‘plar nisbati 8:1 ni tashkil etdi.
Ro‘ziqul Berdiyevning jamoasi nafaqat natijalar, balki o‘yin uslubi bilan ham muxlislar e’tiborini qozonmoqda. “Ajdarlar” har bir o‘yinda intizomli harakat, kuchli pressing va hujumda samaradorlik namoyish etmoqda.
Hozirgi paytda «Nasaf» Superliga jadvalida 53 ochko bilan peshqadamlik qilmoqda va chempionlik uchun asosiy da’vogarlardan biri hisoblanadi.
Futboldagi barqaror natijalari bilan Ro‘ziqul Berdiyev nafaqat jamoasining, balki butun mamlakat futboli rivojiga hissa qo‘shayotganini ko‘rsatmoqda.
“Zamin”ni Telegramʻda oʻqing!
