“Manchester Siti” bosh murabbiyi Xosep Gvardiola zamonaviy futbolda jamoalar uchun kutilmagan ustunlik berishi mumkin bo‘lgan yangi taktik usul paydo bo‘lganini ta’kidladi. Ispaniyalik mutaxassisning fikricha, bu usul yaqin orada har bir katta jamoa taktikasida muhim o‘rin tutadigan “qurol”ga aylanishi mumkin.
Gvardiolaning aytishicha, hozirda ko‘plab jamoalar yon chiziqdan to‘pni uzoq masofaga tashlab berish orqali hujumni boshlash usulidan samarali foydalanmoqda. Bu esa ko‘p hollarda burchak zarbasi yoki jarima zarbasiga teng xavf tug‘diradi.
“Hozir futbolda yangi tendensiya kuzatilyapti — yon chiziqdan to‘pni uzoqqa tashlab berish orqali raqib darvozasi atrofida xavfli vaziyat yaratish. Bu kichik narsa emas. Bizda buni eplay oladigan o‘yinchi yo‘q. Ilgari Kayl Uoker buni uddalay olardi, ammo biz uning bu mahoratidan unchalik foydalanmaganmiz,” — dedi Gvardiola jurnalistlar bilan suhbatda.
Mashhur murabbiyning ta’kidlashicha, bu usul hozir “Arsenal”, “Tottenhem” va “Brentford” kabi jamoalarda keng qo‘llanilmoqda. Ular to‘pni bir harakat bilan raqib jarima maydoniga yoki bevosita darvoza oldiga uzatish orqali raqib himoyasini noqulay holatga solmoqda.
“Bu usul menga yoqadimi-yo‘qmi — bu muhim emas. Asosiysi, bu hozir futboldagi yangi qurol. Uni bartaraf etish oson emas. Hozir deyarli har bir jamoa bu taktikani ishlatishni o‘rganmoqda. Shu sabab biz ham unga ko‘nikishimiz kerak,” — deya qo‘shimcha qildi Gvardiola.
Gvardiola fikricha, zamonaviy futbolda har bir mayda detal muhim ahamiyat kasb etadi. Himoyada kichik xato yoki jismoniy kuch yetishmasligi butun o‘yin taqdiriga ta’sir qilishi mumkin. Shu bois u o‘z jamoasi uchun to‘pni qo‘li bilan uzoq masofaga tashlay oladigan yangi o‘yinchi izlashni rejalashtirganini yashirmadi.
Manchesterlik murabbiyning bu fikrlari Angliya sport OAVlarida katta muhokamaga sabab bo‘ldi. Ko‘plab ekspertlar Gvardiolaning “bunday yondashuv”ni jiddiy qabul qilishi uning taktik fikrlashda har doim raqiblaridan bir qadam oldin ekanini yana bir bor isbotlaganini ta’kidlashmoqda.
Aytish mumkinki, Gvardiola uchun har bir chiziqdagi o‘zgarish — bu yangi imkoniyat. Uning so‘zlari bilan aytganda, “zamonaviy futbolda g‘alaba mayda detallarni to‘g‘ri his qilishda”.
“Zamin”ni Telegramʻda oʻqing!
